Çalakîya Nobete ya Ocalan rê Azadîye ke bajarê Strasbourgî de vernîya awanîya Konseyê Ewropa de dewam kena, hewteyo 358. de ya. Çalakîya ke 25ê Hezîrana 2012î de ameybî destpêkerdene, bêmabên dewam kena. Heta ewro sîyasetmedar, hunermend, roşnvîr, ciwan, cinî xeylê kesî beşdarê çalakîye bîyî.
Çalakîye na hewte hetê grûba ke Hamburgî ra ameye ra dewr girîyaye. Grûba Hamburgî mîyan de Rojdagul Taylane, Mehmet Serdar, Musa Agirman û Sabrî Taylan ca gênî. Çalakwanan ra Sabrî Taylanî qisey kerd û bal ant grevê vêşanîye ke vera tecrîdo ke Rayberê Şarê Kurdî Abdullah Ocalanî ser o yeno domnayene de estî ser. Taylanî va ‘prosesêko winasî de wezîfeyê pîlî kewenî milê roşnvîr û demokratan ser’ û wina va: “Rewşa Rayberîya ma û bi hezaran kesê ke grevê vêşanîye de yî krîtîk a. Nêdîyayîşê nînan korbîyayîş o. Ganî herkes destê xo rono ser wijdanê xo û vera tecrîdî de bêveng nêmano.” n ANF / STRASBOURG