Çalakîya Nobeta ‘Ocalan rê Azadîye’ ke 25ê Hezîrana 2012î ra nata vernîya awanîya Konseyê Ewropa û CPTyî de yena viraştiş, bêmabên dewam kena. Nobete her hewte grûbê ke cîya cîya hetan ra yenî ra yena dewrgirewtiş û çalakîya nobete eynî wextî mîyanê çalakîyê ke seba azadîya Ocalanî yenî viraştiş de sey çalakîya tewr derge yena zanayîş. No hewte nobete hewteyo 307. de hetê grûba ke bajarê Gîessenî ra ameye ra yena girewtiş. Grûbe mîyan de kesê bi nameyê Hedîye Ecere, Salîha Şene, Halîl Goktepe û Emîn Emektar ca gênî. Ser nameyê grûbe îzehet ame dayîş û ame vatiş ke esaretê Rayberê Şarê Kurdî Abdullah Ocalanî nîno qebulkerdiş. Endamê grûbe dîyar kerdî ke giranbîyayîşê tecrîdî çareserîya problemê kurdî asteng keno û wina vatî: “Ocalan tena seba kurdan nê, seba problemanê heme dinya çareserî gêreno.” Endamê grûbe veng dayî CPT ke wa bi hawayo lezabez şêro Girawa Îmrali û rewşa Rayberê Şarê Kurdî ser o cigêrayîşan bikero û dayî zanayîş ke nêzelalîya ke derheqê rewşa Ocalanî de esta, mîyanê krudan de etirîyayîşêko cîddî virazeno. ANF/STRASBOURG