Kurdê ke Awrûpa de ciwîyenê xo serva nûmayişanê ‘Ocalanî rê Azadî’ kenê hadre. Nûmayişî 19ê Hezîran de Strasboûrg de destpa kenê. Nûmayişa nobed ya ’Ocalanî rê Azadî’ ke 25ê Hezîran 2012 de sûka Fransa Strasbûrg de destpa kerd ramena. Serragêra nûmayiş de temsîlkarê KCDK-E nobed dewr gênê û kenê hera. KCDK-E venga tewrbîyena nûmayiş da. 

KCDK-E hefteya verîn de aşkere kerd bi ke Awrûpa de serva serbestîya Rayverê Şarê Kurd Abdullah Ocalan’î rêzeçalekîyan virazenê. KCDK-E eve jû damûstayîneke plansazîya xo ya nûmayişan aşkere kerd bi. Goreyê na plansazî 19ê na aşm ra tepya xêlê welatan de nûmayişê nobed, rayşîyayiş, mitîng, ronayenê standê enformasyon û kampanyaya îmzeyan yenê virasten. 


Nûmayişî 19ê aşm de destpa kenê

Startê nûmayişan 19ê Hezîran de Strasbûrg de yeno dayen û nûmayişî dê heta 15ê Tebax biramê.

Serragêra nûmayişa nobeda ‘Ocalanî rê Serbestî’ de hemserok û temsîlkarê KCDK-E nûmayiş dewr gênê. Xêlê sazîyê kurd ê Awrûpa bi (pê) rayverînê Kongreyê Civakê Demokratîk ê Kurdanê Awrûpa KCDK-E dê tewrê nûmayişa nobed bibê. Çarçoveyê nûmayiş de 23ê Hezîran de eve tewrbîyayinê parlementeranê HDP, dostanê Awrûpayî û Tirkîyeyijan damûstayin do bîro dayen û wastena azadîyê Ocalan’î biyarîyo ziwan.  KCDK-E  bi wesîleyê nûmayişa nobed damûstayîneke newî da û veng da Kurdistanij û dostanê ci ke tewrê nûmayişa nobeta serbestîya Ocalanî bibê.”


Bi tecrîdî şantaj kenê

KCDK-E da zonayen ke dewleta Tirk dûştê şarêe kurd plana qirkerden visto dewre û nîya va: “Dewleta Tirk polîtîkayanê qirkerden eve girankerdenê tecrîdê dûştê Rayver Apo destpa kerd.  Dewlet hedef kena ke eve îzolasyonê Rayverê ma êşkena xêlê çî bikero. Nayî ra jû serrî ra vêşî yo tecrîdê Îmrali roj bi roj kena giran. 

Erdogan û AKP tecrîdî dûştê Hereketê Serbestî zey şantajekê şixulnenê demê çarekerdişî tol vet û raya herbekê bi gonîn kerdî a. “ Kongreyê Civakê Demokratîk ê Kurdanê Awrûpa vist vîrî ke nezdîbîyayişê Ocalanî, nezdîbîyayişê şarê kurdî yo û va tecrît yeno maneya xorînkerdişê herb û pirodayişan. 


Jû serrî yo Rayverê xo ra xeber nêgênime

KCDK-E da da zonayen ke şarê kurd 5ê Nîsan 2015î ra na het Ocalan’î ra xeber nêgêna û hayr ant tekoşînê şarê kurd ser: “Ma rîwalê rewşê Rayverê xo şik û qaxûyan mîyan de yê. Nayî ra 4. serragêra nûmayişa nobeda ‘Ocalan’î rê Azadî’ hona jêde bi name ya. Verîya 4 serran Strasbûrg de, ver Konseya Awrûpa, Parlamenê Awrûpa û CPT de nûmayişa bê mavên ya nobed destpa kerd. Na nûmayiş her hefte hetê jû komekê 5 kesan dewr amê giroten û ramitene. Na nûmayiş heta ke Rayver Apo azad bibo do dewam bikero. Ma bawer kenê ke şarê Kurd û dostê ci dê wayîrê na çalakî bivejyê.”

Damûstayîna KCDK-E de hayr ancîya herbê qilêrîn yê dewleta tirk ser zî: “Serbestîya Rayver Apo do netîceyê tekoşîna, nûmayiş û aktivîte berzîn de bîro ca. Serkewtişê Xoserîya Demokratîk ke Cizîr, Sûr, Sîlopya, Şirnex û pêrokîn Kurdistan de berz bena girêdayê serbestîya Rayver Apo yo. Nayî ra 4. serragêra nûmayişa ‘Serva serbestîya Rayver Apo nobedeme’ de 19ê Hezîran de zey temsîlkaranê KCDK-E dewr gênime. Veng danime pêrokîn welatperweranê kurd, demokrat, roşnbîr, genc, cenî û pêrokîn çormeyanê demokratîk ke tewrê nûmayiş bibê. 


Hemle ya enformasyonî 

Goreyê plansazîya KCDK-E çarçoveyê rêzeçalakîyan de xêlê cayan de standê enformasyon ronîyenê. Standê ke mavêna 20-30ê Hezîran de sûkanê zey Koln, Dusseldorf, Dortmûnd, Hannover, Hambûrg, Bremen, Berlîn, Frankfûrt, Stûttgart, Munîh, Nurnberg, Mannheîm, Bern, Bassel, Zurîch, Cenevre, Marsîlya, Lyon, Parîs, Roma, Japonya, Bruksel, Amsterdam, Den Haag, Stockholm, Oslo, Helsînkî, Kanada, Avusturalya û Kopenhaag ronîyenê de do hayr biancîyo tecrîdê vera Ocalan’î, polîtîkayanê qetlîam ke hetê AKP Kurdistan de yenê ramiten ser. 

1 û 15ê Temûz de pêrokîn welatanê Awrûpa de her roj seatanê şan de rayşîyayiş û mitîngî zî dê virazîyê. Mavêna 15ê Temûz û 15ê Tebax de kî her peynîya hefte rayşîyayişê girsî yê navendî dê bîrê organîzekerden. Heto bîn ra HDK-A zî do destpa kampanyaya ‘Mebe pîyakarê sûcî’ bikero. 


 ANF/STRASBOURG