SERKAN DEMÎREL / ANF/CENEVRE
Yewîneke Taybet ke girêdayê Konseyê Heqanê Mordeman yê Neteweyê Yewbîyayeyî ya, derheqê îxlalkerdişê heqanê mordeman yê Kurdistan û Tirkîye de raporeke hadre kerd û teslîmê Komîserîya Berz yê Heqanê Mordeman kerd. Leteyekê na raporî do rapora serrane yê Neteweyê Yewbîyayeyî de ca bigîro. Rapora serrane do kombîyayîşê 34. yê Komîserîya Berz ê Heqanê Mordeman de bîro aşkerekerdiş. Ajansa Xeberan yê Firatî derheqê na raporî de verîya nika xeberekê bi nameyê “Wehşeta ke Cizîre de qewimya ver destê Konseya Ewropa yê NY de ya” weşîna
Heyetê HDP bi sermîyananê NY ra pêdîya
Heyeteke Parlamenteranê HDP; Parlementera Wan’î Tûba Hezer, şahîdanê qirkerdena Cizîr’î ra Faysal Sariyildiz, Temsîlkarê Ewropa yê HDK Demîr Çelîk, temsîlkaranê Ewropa yê HDP ra Eyup Dorû û Temsîlkarê Navenda Heqanê Mordeman ê Kurd yê Cenew Mehmet Îlkhan, seba ke hayr biancê binlingkerdişê heqanê mordeman yê Kurdistan û Tirkiye, bi heyetekê yê Konseya Heqanê Mordeman ê NY ra pêdîyayîş viraştî.
Pêdîyayişî de raportorê Yewîne Taybet ê Konseyê Berz yê Heqanê Mordeman yê NY ke maseyê Tirkîye weyneno û şefê Emerîka, Ewropa, Asya ke na yewîne zî girêdayê ci ya Gîannî Magazzenî amade bî.
Heyetê HDP îxlalê heqan vist vîrî
Parlamentera HDP Tûba Hezer ke derheqê pêdîyayişî de zonayişî day ANF, ard ziwan ke pêdîyayîş rind ravêrd û înan derheqê îxlalanê heqan yê Kurdistan û Tirkîye de zonayişî day heyetî. Goreyê zonayîşanê Hezer heyetî herzewbîn qewîmyayîşê ke dewa Nisêbîn Xerabê Bava de ke 2 hefte yo ke bin eblûqa de yo zî heyetê NY hayderey kerdo. Tûba Hezer vist vîrî ke zey heyetî înan bîyayîşê Cizîr, Sûr û Nisêbîn dibare ardî ziwan û Neteweyê Yewbîyayeyî ra waştî ke seba vernîgirewtişê binlingkerdişê heqan yê ke Kurdistan û Tirkîye de benê bikewê hereket. Heyetî pêdîyayişî de herzewbîn hayr ant hêrişanê vera HDP ser
Hezer ard ziwan ke heyetê NY pêdîyayîşê bi înan ra muhîm dî û va, “Pêdîyayîşî de ma fehm kerd ke NY qewimyayîşanê Kurdistan û Tirkîye nezdî ra taqîp kena. Babeda binlingkerdişê heqanê mordeman de bîyê hemfikir.
Rapor teslîmê Komîserîya Berz ê Heqanê Mordeman bî
Parlamenter Hezer herzewbîn dîyar kerd ke bado ke înan agahî day heyetî ra dima Gîannî Magazzenî qisey kerd û wina va: “Magazzenî ma rê vat ke, ‘No wextekê derg o ê binlingkerdişê heqanê mordeman ê Tirkîye û başûrrojhelatê Tirkîye nezdî ra taqîp kenê. Rapora ke ma hadre kerd, ma teslîmê Konseyê Berz yê Heqanê Mordeman yê NY kerd. Leteyekê gird yê na raporî do rapora serrane yê Komîserîya Berz ê Heqanê Mordeman de ca bigîro. Rapora serrane do pêşkeşê roniştenanê heqanê mordeman ke rojanê vernî de destpa kenê bibo. Xebatê ma yê ser tespîtkerdişê heqanê mordeman yê Tirkîye û amadekerdişê raporan do dewam bikero.”
Magazzenî: Tirkîye vera însanetî sûc kerd
Goreyê vatişanê Hezer, Magazzenî dayo zonayen ke wextekê derg o ê wazenê bi heyetekî rewşa Tirkîye qontrol bikerê, la Tirkîye cewab nêdana nê waştenanê înan. Magazzenî aşkere kerdo ke enê hewldayenê înan dê dewam bikerê û vato, “Xebatekê dergî ra dima ma resyayî no qeneatî ke Tirkîye de vera mordemîye sûc ameyo kerdiş. Gureyê ma ser na babedî ramenê.”
Hezer da zonayîş ke, Magazzenî her zewbîn înan ra persa ’Demografîyaya sûkanê zey Cizîr, Sûr û Nisêbîn vûrnîyayo ya nê’ kerdo.
Rapora Demîrkaya NY de veng da
Heto bîn ra Sazîya Tipa Edlî yê Swîsre derheqê kiştişê Berjîn Demîrkaya ke cêrzemîneke Cizîr de, rapora ‘sifte amê kiştiş, dima ra amê veşnayîş’ amade kerdbî. Na rapor tesîr kerd ke Konseya Heqanê Mordeman bireso na qenatî ke Tirkîye de vera heqanê mordeman de sûc ame kerdiş.
Zewbîn zî raportorê Yewîneya Taybet ê Maseya Tirkîye, Hezîrana 2016’î ra tepya bi şahîd û mexdûran ra pîya xêlê temsîlkaranê sazîyanê civakî yê sivîl ra pêdîyayîşî viraşt û komkiştenê ke dewleta Tirk yê Bakurê Kurdistan de kerdî, nezdî ra cipersayîş kerdbî.