Kongra Gel mavêna 1-4ê Tebaxî de 10. Civata xo ya Pêroyî viraşt. Kombîyayiş ra dima derheqê Rayverê Şarê Kurd Abdullah Ocalanî de bi aşkerekerdişeke vengê nûmayişan da. Aşkerekerdiş de vajîya ke roj, şexs dê Rayverîya de wayîrvejyayişê roj û ameyişê xo yo.Civata Pêroyî yê Kongra Gel 7 serrî ra heta 70 serrî veng da Kurdistanijan ke bi şîara “Azadîya Rayverîyê ma azadîya ma ya” bivejyê meydanan û heta azadîya ci meydanan ca meverdê.
Şarê kurd serva Rayverîya xo ser telîyan de yo. Çike Rayver Ocalan ke 17 serrîyo şert û mercanê zaf giranî û bin îzolasyonî de xover dano ra wextekê derg o xeber nîna giroten. 5ê Nîsane 2015î ra na het ne malbat, ne pawitox ne zî heyetekê nêşiya şirê Îmrali. Kes nêzano ke rewşê Rayver Ocalanî senîn a. Badê qewimyayişanê peynî yê Tirkîye pêrokîn awirî açarnîyay Rayver Ocalanî ser. Çike ser Îmrali de hesab, sîyaset û bazarîyê zaf leyminî (qilêrîn) yenê ramiten. Vejya werte ke Rayver Ocalan wextanê peynî de raştê tehdîtanê dîrek û îndîrek ameyo. Nayî ra şarê kurd û hereketê serbestî yê kurd zaf bi guman ê.
Dewlet û hikûmeta tirk bi na polîtîkaya talokeyî û leymin sebrê şarê kurd sencena. Verra hereketê serbestî yê kurd û şarê kurd sîyaseta tehrîk û provakasyonî ramena. Bi şantaje tecrîdê girankerdî hereketê serbestî rê teslîmbîyayiş ferz kena.
Dûştê na polîtîkaya qilêrîn hereketê serbestî yê kurd helwestekê zelal damûsna. Fermandarê Qerargeha Navendê Pawitişê Şarî Mûrat Karayilanî vist vîrî ke Erdogan û AKP dûştê şarê kurd û Rayver Ocalanî de polîtîkaya zilm ramena û îqazê ‘Bi sebrê m ara kay mekerê’ kerd. Karayilanî va, ‘Eke cuya Rayver Apo bin talokede yo se, cuya pêrokîn lîderanê Tirkîye zî bin taloke de yo.’ Karayilanî aşkere kerd ke na sîyaset qetî nîna qebûlkerden û nê zonayişan bare kerd: “Bi seyan raporê fedaî yenê. Mîlîtanê Apoyî serva herbekê bê sînor pêşnîyazan kenê. Ma nika qontrol kenê, la sînorê her çîyî esto. Vatiş û mesajê Karayilanî zaf zelal ê. Îşaretê herbekê xorîn keno. No quwetê gerîlayanê kurd zî esto. Aşmanê peynî de bi seyan lejker, tîmê hereketê teybet, qoricî û polîsê dewlet amey kişten. Çalekîyê fedaî yê Enqera damûsna ke gerîlayê kurd êşkenê derbeyê girdî dewlet ro dê. La nika herbekê bi qontrol yeno ramiten.
Serva xeber girotiş, weşî û azadîya Rayver Ocalanî ya muhîm vinderdiş û xoverdayişê şarî yo. Serwedardiş, nûmayişê bêîtatîyê sivîl û qerardarîyê şarî yo. Encex helwest û vinderdişê şarî êşkenê vernîya talokeyîn bigîrê. Xo ra nika welat û teberê welatî de şarê ma ser payan o û meydanan de serbestîya Rayverê xo qîreno û vanê ‘Rayverê ma xeta ma ya sûr o’. Nayî ra ganî nê nûmayişan ra peyser gam nîro eştiş û heta ke sazgeh û dewletê mavên netewî bikewê hereket biramê. Zewbîn tercîx û rayekê bîn çîno û taloke gird o. Zey şarê kurd ma her çîyê xo deyndarê Rayver Ocalanî yê û nika wextê wayîrvejyayişê ey o. Verîka ke zerarekê bîro ser Rayverê ma ganî ma nika bikewê hereket û sebikerê se nika bikerê. Sloganekê kurdan esta ke wextê Komployê 15ê Sibat ra na het yena vaten; “Destê ke dergê Rayverîya ma benê yenê şikiten”. Endî o wext no wext o.