Psîkolog û Wezîfedarê Musnayîşî Dr. Mihemed Nasirî derheqê mesajê Ocalanî de dîyar kerd ke Ocalan seba aştîye aktorêko muhîm o û wina domna: “20 serrî yo ke Îmrali de şert û mercanê zehmetinan de cuyeno. Ocalan merdimanê sey Mahatma Gandî û Mandelayî yo. Dinya de hûmara merdimanê winasîyan 10-12î ra zêdeyêr nîya.”
DANA OMER / ROJNEWS / SILÊMANÎ
Rayberê Şarê Kurdî Abdullah Ocalanî 7ê Tebaxe de avûkatanê xo reyde pêvînayîşêk kerdbi û ewja de mesajê muhîmî daybî. Ocalanî seba çareserîya problemê Kurdan vatbi “Ez amade ya û xo ra bawer kena. Ez eşkena hewteyêk de çareser bikera. Labelê wa aqlê dewlete zî çîyo ke hewce keno, bikero.”
Psîkolog û Wezîfedarê Musnayîşî yê Unîversîteya Koyê Dr. Mihemed Nasirî derheqê mesajê Ocalanî de qisey kerd. Dr. Nasirî dîyar kerd ke seba pêameyîşê aştîye Ocalan aktorêko muhîm o û va ‘seba ke herême de aştîye bêro awankerdene, ganî no het de gamê qerardarî bêrî eştene’.
Dr. Nasirî va ‘aştî yeno manaya bi temamî qedîyayîşê şerî’ û wina dewam kerd: “Aştî verê cû bi keye, serkêşê eşîran û rîsipîyan reyde ameyêne kerdene. Labelê badê dewlete û împaratorîyî ameyî awankerdene, êdî peynîya şeran de yenî kerdene. Ewro tena mîyanê Kurdan de nê, Balkanan de, Bosna de, Sirbîstan de, Afrîka de û sewbîna xeylê cayanê bînan de şerî estî. Eke sîstemê ke şarî baş yenî perwerde kenî bêrî awankerdene, o wext kesê ke aştîye wazenî yenî resnayene. Heta nika bêxera PKKyî ti sîstemî merdimanê tesîrinan nêresnayo.”
Ocalan sey Gandî û Mandelayî yo
Dr. Nasirî bale ante esasgirewtişê aştîye yê Ocalanî ser û wina va: “Ocalan Îmrali de mesajanê aştîye dano. Reyna heta nika pratîk de xeylê çîyî kerdî. 2013 de vatbi ‘Azadîya mi seba dîyalogî bi hawayo şert meronê’. No vatiş seba şarêkî hetê rayberê ci ra sey alternatif ame pêşkêşkerdene. Ocalan seba aştîye her tewir fedakarîye keno. 20 serrî yo ke Îmrali de şert û mercanê zehmetinan de cuyeno. Ez zî zîndan de menda û hepsîyan reyde xebetîyaya. Ez eşkena vaja ke Ocalan herçiqas ke şertê zehmetinan de maneno zî vindetişêko rûmetin nîşan dano. Ocalan merdimanê sey Mahatma Gandî û Mandela reyde eynî yo. Dinya de hûmara merdimanê winasîyan 10-12 hebî ra zêdeyêr nîya.”
Aştîye zehmetin a, labelê ganî ma bixebetyî
Dr. Nasirî qiseykerdişê xo de qala hêrişanê dagîrkerîye yê dewleta Tirkî yê vera Başûr û Rojawanê Kurdîstanî de kerde û wina va: “Badê ke dewleta Tirkî teyaraya Rûsya da waro, mabênê her di dewletan de problemê girdî ameyî cuyayene. Tirkîya bi herînayîşê sîlehanê giranan mabênê xo û Rûsya raşt kerd. Dewleta Tirkî zafaneyê ameyeyê xo seba şerî xerc kena. Sîlehanê ke herînena, vera Kurd û şaran de şuxilnena. Ewro şarê Tirkîya krîzî ver zehmetîyan cuyenî. Labelê Tirkîya hîna şer de israr kena. Ez zana na herême de pêardişê aştîye zehmetin o labelê ganî ma xebatanê xo bidomnî.”
Ganî şar çarçewaya yewîye de bêro perwerdekerdene
Dr. Nasirî peynîya qiseykerdişê xo de wina va: “Ma do çarçewaya kerdişanê Qazî Mihemed, Mam Celal û Birêz Ocalanî tayê çîyan bikerî. Mesût Barzanîyî va ‘ez do nêverda ke Kurdî gonîya yewbînan birijnî’. Eke partîya ci zî sey nê vatişî hereket bikero, o wext çîyê bîyayeyî do bivejyî werte. Ganî seba yewîya neteweyî tayê çîyî bêrî kerdene. Cok ra ewil ganî programanê aştîye ra dest pêbikerî. Bitaybetî mekteban de gerek perwerde bêro dayene. Reyna ganî kongreya neteweyî ke Ocalanî 2013 de pêşnîyaz kerdbî ser o xebatî bêrî kerdene. Tewr muhîm zî ganî şar çarçewaya yewîya neteweyî de bêro perwerdekerdene.”