Sîyasetmedar Ûfûk Ûrasî da zanayene ke mesajê Ocalanî temînatê ameyoxî yo û wina va: “Qanûno bingeyîyêko newe de ganî seba Kurdan hemwelatîya seyyewbînane bêro esasgirewtene. Eke Kurdî nêrî esasgirewtene, o wext problemî çareser nêbenî.” Parlamentere Huda Kaya zî dîyar kerde ke çimeyê heme probleman de tecrîd esto.
Hukmatê AKP herçiqas ke ekonomî ra heta cuya komelkî xeylê hetan de netîceyê xirabinî girewtî zî polîtîkaya çaresernêkerdişî de israr keno. AKP bi nê polîtîkayan mabênê şaran de cîyakarîye awan kena û bi no hewa hewl dano îqtîdar de bimano.
Rayberê Şarê Kurdî Abdullah Ocalan 7ê Tebaxe de bi mabênkarîya avûkatanê xo veng dabi dewlete û raya pêroyî û vatbi ‘Tarîx de zî aseno ke bêtirkan Kurdî, bêkurdan Tirkî nêbenî û eke Mezopotamya de estena Kurdan biqedîyo o wext Anatolîya de Tirkîtîye zî nêmanena’ û nîşan dabi ke o eşkeno hewteyêk de problemê Kurdan çareser bikero.
Sîyasetmedar Ûfûk Ûrasî derheqê mesajê Ocalanî de qisey kerd û dîyar kerd ke ganî mesajê Ocalanî raşt bêro famkerdene. Ûrasî bale ant hemkarî û piştîdayîşyewbînananê Tirk û Kurdan ser û va ‘Şerê RizgarbîyayÎşî û awanbîyayîşê Komare de bi hawayo aşkere aseno ke hemkarî û piştîdayîşyewbînanê Kurd û Tirkan esto’ û wina domna: “Badê ke Îttîhat Terakkî zîhnîyetê tekperestî xelq kerd, ê zîhnîyetî aye roje ra heta ewroyî estena xo domna.”
Mesajê Ocalanî temînatê ameyoxî yo
Ûrasî dewamê qiseykerdişê xo de wina va: “Na çarçewa ra bêro ewnîyayene mesajê Ocalanî temînatê ameyoxî yo. Qanûno bingeyîyêko newe de ganî seba Kurdan hemwelatîya seyyewbînane bêro esasgirewtene. Eke Kurdî nêrî esasgirewtene, o wext problemî çareser nêbenî. Seba çareserîya sîyasî lazimîye bi mutabakato sîyasî esto. Ocalan zî hewl dano îradeyêka sîyasî bivejîyo werte. Tena bi polîtîkayanê ewleyîye nêresîyeno cayêk. Xora hende serran de no ameyo famkerdene. Ganî îttîfaqo tewr hîra bêro xelqkerdene. Ganî demêko nizdî de no bêro awankerdene.”
Wazenî hêvîya şaran çin bikerî
Parlamentera HDPyî ya Stenbolî Huda Kaya zî dîyar kerd ke çimeyê heme probleman de tecrîd esto û wina dewam kerd: “Wexto tecrîd giran beno, şarî ser o zextî zî zêde benî. Xora Tirkîya de vernîya weçînayîşê 7ê Hezîrana 2015î de hêvîya xo ya aştîye û huzûrî birna. Çimkî o wext tecrîd ame destpêkerdene û heta ewro dewam keno. Xora armancê tecrîdî o yo ke mesajan bido vindarnayene. No aşkere û zelal o. Tewr peynî bi grev û rojeyanê mergî tayê çîyî bîbî. Labelê senî ke pêvînayîşî birîyayî, qayûmî ameyî. Nêyî yewbînan ra qerfîyaye nîyî.”
Ma çiqas bibî yewe hende nizdîyê azadîye benî
Kaya dîyar kerde ke hukmatî dî ke Kurd û sîyasetê Kurdan de pêvînayîşan ra dima senî bedilîyayîşî bîyî û wina va: “Hukmatê AKPyî vînîkerdişê Stenbolî ver waşt Kurdan ra heyf bigîro. Ewro îqtîdar wazeno Kurdî qayûman reyde mijul bibî. Ma zanî qayûmî tena bajaranê Kurdan reyde sînordar nîyî. Xora no qiseykerdişê Wezîrê Karê Zereyî de zî esto. Weçînayîşê 31ê Adare de vînî kerd û tîya de wazenî Kurdan ra heyfê ci bigîrî. Zulm, şiddet û gonîye reyde welat nêxelisîyeno. Ma çiqas bibî yewe hende nizdîyê azadîye benî.”
AMED