Teşebusê derbe yê 15ê temmuze û dima ra 20ê Temmuze de îlankerdişê rewşa OHALî ser ra serrêk vîyart. Prosesê OHALî de her tewir hêriş û bêhuqûqîyî ameyî kerdiş û bi hezaran kesî ameyî erzîyayî zîndanan. Mîyanê serrêk de bi hezaran tewqîfkerdiş, îxraçkerdiş û qetilkerdişî ameyî kerdiş û xeylê dozî abîyî.
Kedkarê Egîtîm Senî yê Êlihî Necatî Dadak, Hemserekê Şûbeya Êlihî ya Sendîkaya Kedkarê Weşîye (SES) Denîz Topkan û Temsîlkara Pêroyî ya Platformê Ma Do Qetilbîyayîşê Cinîyan Bivindarnî (KCDP) Gulsum Kave qisey kerdî û derheqê Serrgêra îlanbîyayîşê OHALî de vînayîşê xo ardî ziwan.
Topkanî qiseykerdişê xo de va ‘OHAL yeno manaya qewîmbîyayîşê faşîzmî’ û wina dewam kerd: “Seba hakimîya îqtîdarî OHAL ame îlankerdiş. Bi hezaran kedkarî bi Qerarnameyê Hukmê Qanûnî (KHK) ameyî îxraçkerdiş. 700 endamê SESî rewşa OHALî de îxraç bîyî û tena Êlihî ra 22 kesî îxraç bîyî. Kesê ke vera AKPyî de sere nêronenî, yenê îxraçkerdiş. Îqtîdar wazeno ke heme venganê muxalîfan bibirno û heme cayan bikero bin kontrolê xo. AKP serrgêra OHALî de dîyarî da ma û bi KHKyêko newe karkeran karî ra eşt. Îqtîdar wazeno ma bitersno. Ma serranê 90î cuyenî.”
Cinîyan kar ra erzenê
Dadakî destpêkê qiseykerdişê xo de bale ant sîstemê wendişî ser û qiseykerdişê xo wina domna: “Rewşa OHALî de sîstemê perwerdeyî serûbin bî. Derbe bi destê îqtîdarî ame kerdiş. Rewşa OHALî de sîstemê perwerdeyî 20 serrî apey şî. Egîtîm Senê Êlihî ra 43 kedkarî gureyê xo ra ameyî îxraçkerdiş. Îlankerdişê OHALî ra dima komel û mekteban de polîtîkayê cînselî aver şîyî. Îqtîdar wazeno ke domananê kênayan perwerdeyî ra dûrî bikero û sîstemê perwerdeyî sey tîcaretî bixebitno. Heme embazê ma yê cinîyî ameyî îxraçkerdiş. Îqtîdar heme çîyan dekerdo bin kontrolê camêrdan û îstîsmaro cînsel wextê îqtîdarê AKPyî de zêde bîyo. OHAL bîyo raybazê îdarekerdişî.”
Rejê zêde bîyo
Tewr peynî Temsîlkara KCDPyî Kave qisey kerde û wina va: “Rojanê peyênan de vera cinîyan de şîddetê camêrdan zêde bîyo. Kesê ke rewşa OHALî de ameyî îxraçkerdiş înan ra se ra 20ê ci cinî yî. Badê îlankerdişê OHALî şîddetê camêrdan bi bedilnayîşê qanûnanê neweyan ameyî pawitiş. Rewşa OHALî de Qanûnê Mehkemeya Ceza (CMK) qerarê dûrîvistişê camêrdan bedilna. Prosesê OHALî de îstîsmaro cînsel û qetilbîyayîşê domanan zêde bî. Yurd û mekteban de heqê domanan yeno îxlalkerdiş. Domanê şenik û cinîyî yenê qetilkerdiş. Sucê ke yenê kerdiş bêceza manenê û cok ra rejêya sucan wextê îqtîdarê AKPyî de zêde bîyo. Ganî cinîyî beşdarê dozê cinîyan bibîy. Çimkî beno ke beşdarbîyayîş netîceyê mehkema ser de tesîr bikero. Ma bîyê şahidê mehkemayanê winasî zî.”
ELÎH/ANQARA