Citkarê dewa Norkoxî ke girêdayeya qezaya Payîzava ya Wanî de citkarî kenî, bêîstîkrarî, krîzê ekonomî û polîtîkayê Tirkîya ver îflasî ver de yî. Babete ser o Nadîr Akbuluto ke bi seracitî debara xo keno, qisey kerd.
Akbulutî dîyar kerd ke heme citkarî bêîstîkrarîya Tirkîya ver mexdur bîyî.Akbulutî dewamê qiseykerdişê xo de wina va: “Vayebîyayîşê dovîzî ra dima toxim, gubre, mazot û heme haletê awedayîşî de vayî virazîya. Ma sewzeyan resnenî. Ma krîzê ekonomî û vayebîyayîşan ver emserr zirar kerd. Ez bi zorî payan ser de vindena û ez nêşona teberê bajarê xo. Ma par bi serayan komunî awan kerdî. La emserr ma çîyek nêkerd. Ma krîzê ekonomî ra zaf zirar vîna.”
Akbulutî qiseykerdişê xo yê peyênan de zî va ‘heme haletanê awedayîşî de 2 qatî vayî virazîya’ û wina qedêna: “Netîceyê krîzê ekonomî do senî bibo merdim nêzano. Lîtreyê mazotî bîyo 4 TL. Ma 2 tonî mazot xerc kenî û 400-500 lître zî benzîn xebetnenî. Paketê toximan verê 100 TL bî, la nika bîyo 250 TL. Mi waşt ke 200-300 donim erdî ser de sewzeyan rona, la tena mi 80 donim rona. Bêîstîkrarî û polîtîkayan ver ma nêresayî hedefê xo.”
DÎHABER/WAN