Yuksekdag bi vîrardişê qurbanîyanê Qirkerdişê 1915î destpa qiseyanê xo kerd û vist vîrî ke zihnîyeta ke bî sebebê dejê 101 serrî rîbirî ameyiş ra remena. Yuksekdag va, gonîya ke ser na hardî rijiya do jû roj gonî biverişo û aşkere kerd ke, tarîxê Tirkîye tarîxê qetlîaman o, nê qetlîaman ra hesap perskerdiş wezîfeyê esasî yê îxtidar a sîyasî yo. Yuksekdag, serragêra 101. de rîwalê qetlîam Ermenîyan ra efû waşt.
Rey danê xîlafet û rejîmê serokîn
Hemseroka HDP da zonayen ke makeqanûna esasî ya serokîn serva makeqanûna dîktatoryal rewa damusnê zey dînî damusnenê û va: “Şarê Tirkîye na zûrî rê emel nêkenê. Makeqanûna ke şarê Tirkîyeyî hewce kenê makeqanûneke demokratîk û azadîwaşt a.”
Yuksekdag hayr ant wedarnayişê heqê ‘destnêdayişî’ yê vera HDP ser û wina va: “Rîwalo ke HDP vernîya projeyê xîlafet yê înan girot, vanê wa HDP meclîs de nêbo. HDP do vernîya nê tehdîdan de milê xo çewt nêkero. Vinderdişê HDP her ca de garantîyê şaranê Tirkîye yo. Bi îcazeto ke ma şarê xo ra giroto, ma dê vernîya nê polîtîkayan de vinderê.”
Fîgen Yuksekdag hayr ant wedarnayişê heqê destnêdayişî yê parlamenteranê HDP ser û wina dewam kerd: “Mudaxaleyê wedarnayişê heqê destnêdayişî operasyonê tesfîyekerdişê pêrokîn meclîsî yo. Yê ke rey bidê wedarnayişê heqê destnêdayişî eynî wextî de îye de rey bidê rejîmê serokîn û îlanê xîlafetî zî.”
Îmzeyê Erdogan’î esto
Hemseroka HDP Yuksekdag cewab da vatenanê Reîscûmhûrê Tirkîye Tayyîp Erdogan’î yê derheqê Mutabeqatê Dolmabahçe û wina va: “Yê ke mutabeqat red kerdî, domanê (qeçekê) no welatî bi merdiş ra rî bi rî veraday. Şima çiqe red bikerê zî, bin mutabeqatî de îmzeyê Erdogan’î esto. Seray dî ke pêvacoyê haştî do sîstemê serokîn nîyaro, cok ra mase werte ra wedarna. Maseyê çarekerdişî day, Seray girotî.”
Sûcê Amedspor’î qeleyê faşîzmî rê gol eştiş o
Yuksekdag hayr ant zext û zorvajîyê verra Ajansê Xeberan yê Dîcle ser û da zonayen ke heqê xebergirotiş yê şaran ameyo xesp kerdiş û wina va: “Wextanê peynî de 9 mûxabîrê Dîha amey tepiştiş. Binçimkerdişî vera raştîyan bêtehamulîya îxtidara siyasî damusneno. Sûcê mûxabîrê ke amey tepiştiş noyo ke, hetê tanqan de nê, şarî het de ca girotiş o.
Yuksekdag herzewbîn hayr ant êrişê verra îdarekaranê Amedspor ser û va, sûcê Amedspor’î qeleyê faşîzmî rê gol eştiş o. Yuksekdag veng da pêrokîn kûlup û hetkaranê Amedspor ke her ca de gol bierzê qeleyê faşîzmî.
DÎHA/ENQERA