Badê ke pêrodayîşê herême vilayê heme welatî bîyî, krîzê ekonomî dest pêkerd û bi îlankerdişê OHALî no krîz her ke şî kûr bî. Bajaranê herême de 2 serranê peyênan de netîceyê qedexeyê tebervejîyayîşan de bi hezaran esnafî dikananê xo padayî.Goreyê Dezgehê Ewleyîya Sosyalî Tirkîya de tena serra peyêne de 204 hezar esnafî kilît dayî beranê xo ro. Zafaneya nê esnafan bi taybetî Şirnex, Sûr, Nisêbîn û sewbîna de dikananê xo padayî. Babete ser o Parlamenterê HDPyî yê Amedî Zîya Pîrî qisey kerd.Parlamenter Pîrî qiseykerdişê xo de vera vatişê Erdoganî yê ‘çi zirarê OHALî sanayî rê virazîya?’ de va ‘zaf zirarê OHALî sanayî û karmendan rê bî’ û wina domna: “Tena merdim vaya dovîzî ra biewnîyo, vîneno ke xeylê zêde bîyo û nêyî ser o deynê karmendan yê teberî rê bîyî 2 qat.”
Îstîkrar çin o
Pîrî dewamê qiseykerdişê xo de ‘tesîrê OHALî yê xelqkerdişî ser ro karmend û şîrketî nêşênî binê deynî ra bivejyî’ û wina dewam kerd: “Ganî seba merdiman cayê karî bêrî aqitnayîş. Nika se ra 15-20 betalî esta. Ganî nê betalan rê kar bêro tehsîskerdiş û seba nêyî zî sermayegozarî lazim a. Dînamîkê zereyî seba girdbîyayîşî qîm nêkenî, ganî teberê welatî ra sermayegozarî bêrî. Eke OHAL bibo, ti sermayegozar nîno Tirkîya. Îstîkrar çin o. Serekkomaro ke vano ti zirarê OHALî ekonomîye rê çin o; ya nêzano yan zî zuran keno. Çimkî her ke şono krîzê ekonomî kûr beno.”Pîrî qiseykerdişê xo de bale ant ser ‘Paketê Teşwîqî yê Ekonomîkî’ ke hetê Serekwezîr Bînalî Yildirimî ra Amed de ameybî aşkerekerdiş û wina va: “Her Serekwezîr wexto ke newe beno Serekwezîr, 3 serran de reyêk yeno Mêrdîn û Amed û nê cayan de karmendan xapêneno û şono. Heta nika sozê ke dîyayî esnafan nêameyî ca.”
Netîce nêgênê
Pîrî peynîya qiseykerdişê xo de va ‘sermayegozarîya tewr gird ke herême de bêro kerdiş agêrayîşê Prosesê Çareserîya Demokratîke ya’ û wina qedêna: “No zî ancax bi ser masayêk de roniştiş û pêşnîyazkerdişê projeyê çareserî mumkin o. Ganî PKK reyde ronîşo, çimkî hetêk o. Şima çiqas paket aşkere kenî, bikerê netîce nêgêno. Eke prosesê çareserî dest pêbikero, lazimî bi paketan nêmanena; çimkî ekonomî xo kom keno.”
AMED – DÎHABER