RÛKEN DEMÎR / OMER AKIN / MA / AMED
Parka Koşuyolu ke qezaya Rezanî ya Amedî de ya, 12 rojî yo ke hetê polîsan ra girîyaya binê abluqa. Seke yeno zanayene na parke de xeylê aktîvîte û çîyê bînî yenî kerdene. Labelê demanê peyênan de seba ke merdimê hepsîyê ke çalakîya grevê vêşanîye û rojeyê mergî de yî ewja de çalakîyan virazenî, dormeyê parke ameya padayene.
Parke her roje saete 12.00 ra ver yena padayene û dormeyê parke bi wesaayîtanê zirxinan yeno girewtene. Abluqa heta saete 17.00 dewam kena. Welatîyan ra Bedîr Doganayî dîyar kerd ke Tirkîya de tena parkî nê, cuya merdiman zî yena tecrîdkerdene û wina va: “Gelo edalet bi girewtişê abluqayî beno?”
Vedat Solmazî zî abluqa şermezar kerd û wina va: “Ewro kam qisey bikero, erzîyeno zîndan. Herkes vîneno ke kam zulm keno. Her hetê cuya ma binê abluqayî de ya. Ma qebul nêkenî.” Welatîyan ra Alî Alkanî dîyar kerd ke wa parke dayîkan rê abo û wina va: “Eke ma sere de wayîrê têkoşînê dayîkan bivejîyayêne, ewro wina nêameyêne padayene. Wa barîyerî bêrî akerdene.” Huseyîn Gulî zî da zanayene ke xeylê kesî padîyayîşê parke ver mexdûr benî û wina va: “No zulm o, şima wina kenî, çi keweno destê şima? Parke şarê rê nîna padayene.”