Nê rojanê peyênan de mesela awankerdişê partîyêka bi namedê ”Partîya Şarê Zazayan” minaqeşe bena û na mesela gilêşkî vista fekê çapemenîya tirkan. Dewleta Tirke, heta nika, seba ke kurdan pê ra cîya bikero û serdesteya xo bidomno, çîyo ke nêkerd nêmend. Nika zî bi sersemeya bêçarebîyayîşê xo yê helnêkerdişê mesela Kurdistanî de wazenê bi çend kurdanê ”zaza”yan yê zeîfan a partîyêk awan bikero. 

Ez wazena na mesela ser o, qisa xo ya peyêne vernî de vaja. No projeyê dewlete û yê AKPî yo. No proje bi wesitayê çend kurdanê ”zazayan”yê ke AKPî mîyan de yê û seba koltix yan zî çend îhaleyan nasnameyê xo yê kurdey û tarîxê xo înkar kenê ya raya şino. Zaf eşkere yo ke no proje, ”pê ra abirnayîş û îdare kerdişê kurdan” ser o ameyo awankerdiş. Ma do bi nê projey a, çend hemkaranê dewletê û AKPî yê bînan zî nas bikerê.  Ma fîlmê winasînî verî zî zaf dîyê. Nê projeyî ra çîyê nêvijêno.

No proje bi ”Zaza-der”î ya eşkere bi. Dima 19ê sibata emserî de, qaşo bi munasebetê Roja Ziwanê Dayîke ya Mîyanneteweyî de Anqara de kombîyayîşê virazîya. Ke ez nameyanê çend beşdaranê ê kombîyayîşî binusa; şima do armanc û mihendîsê ke nê projeyî pey de yê tavilê fam bikerê. Beşdaranê kombîyayîşê Anqarayî ra çend kesî:

Hetkarê Serekê Pêroyî yê AKPyî Cevdet Yilmaz, çend parlamenterê AKP yê Çewlîgî û şaristananê bînan, çend karsazê çewlîgijî ke yan eleqeyê înan bi AKP yan zî MHP ya esto, şaredarê  Çewlîgî Yucel Barakazî, ”Serekê Pêroyî yê Konfederasyonê Qorîcîyan û Keyanê Şehîdan”  Zîya Sozen, çend wayîrê rojnameyanê ke Çewlîg de vijênê, çend hunermendê çewlîgijî û xeylê AKPyî yê bînî. 

O kombîyayîşê Anqarayî de çi ame qisekerdiş? Qiseyê nê kombîyayîşî pêro çarçewaya “Ma kurdî nîyê”, “Ziwanê ma lehçeya kurdkî nîya”, “Ma televizyon wazenê” de bî.

Nê kombîyayîşî dima xebata parçekerdişê kurdanê zazayan dewam kerd û netîce de Anqara Kizilay  de, bînayêda lukse de merkezê partî abya. Medya de ame vatiş ke do program û nîzamnameyê na partî peynîya gulane de teslîmê Wezaretê Zerî bibo. Programî ser o tayn çî yenê vatiş, labelê seba ke program ma dest de hewna ze belge çin o, ez do no nuşte de programî ser o çîyê nênusa. Program vejya tepya ma do fikrê xo binusê. Labelê seke mi cor de zî va, nîyet û armancê na partî zaf eşkera yê. Dewlete wazena kurdanê zazayan kurdanê bînan ra abirnê, kurdan zeîf bikerê û serdesteya xo kurdan ser o dewam bikerê.

Belkî çend zazayê kurdî yê ke seba kadroyêdê karî, çend îhaleyan yan zî seba karmendeyê xo înkar bikerê û xo şenik bikerê û şexsîyetê xo bîgîrê lingan bin. Demeyo ke lîsta awankerdoxanê na partî eşkera bibo, ma do bişê tayn analîzanê hewna xorîyan bikerê. Labelê kurdê zazayî yê ke nasneme, tarîx û kulturê xo rê wahêr vejênê do nê projeyê AKPî cidî nêgîrê. 

Tarîxêndo sîyasî yê kurdanê kirmancan yanê zazayan û kurmancan o cîya çin o. Sêx Seîd, Seyîd Riza, Dr Şivan, Nûreddîn Zaza, Yilmaz Guney, Necmeddîn Buyukkaya, Mazlûm Dogan, Sakîne Cansiz û bi seyan a kurdê zazay yê bînî lîderê hereketê kurdan bî û sebe eynî armancî, yanê azadeya Kurdistanî xebate kerda û ganê xo dayo. Kam şeno nê lehengan tarîxê hereketê kurdan ra vejo?

Mîmar û muhendisê nê projeyî kiştê ra xebata şaredarîyanê ma yê ke seba averşîyayîşê kurdî (kirmanckî/zazakî  û kurmancî) vindarnê, dezgeyê ziwan û kulturê kurdkî yê sey krêşî, dibistanî, tiyatroy, kursî pêro girotî, esstîtuyî, komelî û kursê ziwanî kilît kerdî; kişta bîne ra vanê ma wazenê ”zazakî bireynê.” Kam înan ra bawer keno? 

Awankerdoxê na partî hewna eşkere nêbîyê. Ez meraq kena. Nê kam ê? Neyna heta nika ziwan û kulturê zazayan (kirmancan) rê çi xizmet kerdo? Nê heta nika kotî bî? 

Ma kirmancî (dimilï, zaza, kirdî) kurd ê. Kurdistan welatê ma yo. Ziwanê ma parçeyêdê kurdkî yo. Tarîxê ma yo sîyasî yew o. Kes nêşeno reşteya nê tarîxî ser o çîyê sûnî awan bikero.