Fermandarê Yewîyê Xoverdayîşê Şengalî (YBŞ) Zerdeşt Rêvînî derheqê polîtîkayê PDKyî yê Şengalî de qisey kerd û dîyar kerd ke her kes zano ke bi hawayo rojane plan û projeyê PDKyê yê Şengalî ser ro bedilîyenî.
Rêvînî vist vîrî ke bedilnayîşê plananê xo de PDK qet menfîetê êzidîyan esas nêgêno û va, "Nê planê PDKyî nêşînayî ke êzidîyan no merhaleyo muhîm ra vejî. Xora planê ke nika wazenî bierzî dewre, parçekerdişê êzidîyan o. No parçekerdiş seba erd û şarê êzidîyan tersêko gird o. Seba înan ti manaya vernîya qirkerdişî de bivinderî, çin a. Eksê ci de hîna zaf do vernîya qirkerdiş û qetlîyaman akerî. Ti planê înan ke êzidîyan bipawî çin î û nêşênî bipawî zî. No proses de lazimîya şarî ya pawitişî lazimîya nane û awe ra muhîmêr a.”
Ma deyndarê şarê xo yê
Rêvînî va ‘eke PDK amade bibîyêne, seba yewîya şarê kurd yan zî yewîya şarê êzidî hereket bikerdêne, nika bedilîyayîşê zaf girdî mîyanê Kurdistanî de û bitaybetî zî mîyanê Şengalî de do bibîyêne. Eke PDK biwaştê êzidîyan bipawo, o wext do yewîyêka girde awan bibîyêne. Nika menfîetê înan yê ke danî meşnayîş heme zî xizmetê dişmenî kenî. Bi vindetişê xo bingeyê fermanê 75an akeno û vernîya nêyî nêgêno. Ma sey hêzê YBŞyî deyndarê şarê xo yî.”
Rêvînî bale ant rewşa êzidî û rêxistina êzidîyan ser û wina dewam kerd: “Nika şarê ma xo rêxistine keno. Ma nika şênê plan û projeyê ke ma ser ro yenî meşnayîş, fam bikerî û eşkenî nê plan û projeyan veng bivejî. Çimkî ma êdî wayîrê vindetiş û îradeyêk î. Hinî şar qebûl nêkeno ke kesê cîya înan îdare bikero. Ma sey hêzê Êzidxanî her hetan de seba pawitişê şarê xo amade yî. Ma destûr nêdanî ke hêrişê şarê ma bikerî.”
Şar êdî raştî vîneno
Rêvînî vist vîrî ke şar êdî bawerîyê xo bi PDK nêano û wina va: "Ma sey YBŞ vera kesê ke seba menfîetê şarê xo kar nêkenî de yî. Ma nêvanî ke wa her kes vera xo bido ma û mîyanê ma de ca bigîro. Çîyo ke ma wazenî esasgirewtişê rayîrê raştî yo. Ma wazenî ke yewîya şarê êzidî esas bêro girewtiş. YBŞ no hîrê serrî yo ke binê her şert û mercî de şarî paweno û do bipawo zî. Nika ma û şar yewbînan temam kenî, ma qebul nêkenî ke şarê ma ver bi çinîbîyayîşî şêro. Heme hewldayîşê ma do seba ke ma bişînbî şarê xo bîyarî ser xeta raşte û râyîrê heqîqetî bibo.”
Vindertişê PDK
Rêvînî peynîya qiseykerdişê xo de da zonayen ke vindetişê PDKyî heta nika ti raştî îfade nêkerd û seba menfîetê şarî çîyêk nêkerdo û wina dewam kerd: "Çimkî nê hîrê serrî yo ke vera şarê ma de şer kerdî û şarê ma dekerdî zor û zehmetîyan mîyan. Hetta hêzanê xerîban ardî û vera şarê ma de dayî şerkerdiş. Bi her hawayî waştî ke îradeya şarî bişiknî. Labelê êdî şarê ma zî ferq kerdo ke nîno kayanê înan. Nika PDK sey hêzêkê kurdan dinya de yeno şinasnayîş, labelê cewherê xo de kurd nîyo. Heme hêz û sîyasetê xo teber ra gêno. Ma eşkenî vajî ke tena bi hawayo şeklî kurd î. Nika heme tevger û vindetişê înan seba dewleta Tirkîya yo. PDK herinda ke kay û hêrişan bikero, eşkeno xizmetê şarê xo bikero. Beno ke PDK teber de vajo ma êzidîyan pawito û hêzê înan awan kerdo. Labelê nê heme polîtîka yî û wazenî Şengal û êzidîyan cewherê înan ra dûrî bikerî. Ma na bawerîye de yî ke şarê ma do nêro kayanê înan û nê polîtîkayanê înan veng bivejo. Ma hêvî kenî ke wa şarê ma yo Başûrê Kurdistanî reaksîyonê xo vera PDKyî de nîşan bido ke ma bişînbî bi azadî û demokrasî pîya bicuyî.”
DÎHABER/ŞENGAL