"Çeteyê DAIŞî wexto ke hêrişê Şengalî kerdî, bi hezaran cinîyê êzidî remnayî û sûkê cîya-cîyayan de sey kole rotî. Operasyonê Azadkerdişê Reqqa de 2 cinîyê êzidî destê çeteyanê DAIŞî ra remayî û bi hetkarîya şerwananê YPGyî ra resayî kampa Newroze.Babete ser o cinîyê êzidî yê ke destê çeteyan ra xelisîyayî, qisey kerdî.
H.Nya 35 serreyî qiseykerdişê xo de va ‘çîyê ke ameyî ma ser eybê ma nîyî, kesê ke dej bi ma dayî antiş wa şerm bikerî’ û wina dewam kerde: “Çeteyê DAIŞî kutikan ra daxî bêrehmêr î. 3 domanî û mêrdeyê mi destê çeteyan de esîr î. Ez û 4 domanê xo zî xelisîyayî. Ma zî 3ê tebaxa 2016 de kewtî destê çeteyan. Çeteyî domanan ma ra girewtî û ma berdî hepisxaneyê Banuşî.”
Cinîyan roşenî û lajekan zî seba şer perwerde kenî
H.N qiseykerdişê xo de da zonayen ke çeteyan hêrişê teyarayan de înan hepisxane ra vetî û berdî Til Afer û wina dewam kerd: “Çeteyî ma berdî dewa Şia û ewja de xo rê cinîyan weçînayênê. Sûrîye de keyna û 2 lajê mi, mi ra ameyî girewtiş. Çeteyan ma berdî sûke û ewja de ma rotî. Ez bi kesê ke sûrîyeyij û dima ra zî kesê ke sûdanijî rê ameya rotiş. Ma şîyî Reqqa û mi ewja de eşnawit ke keynaya mi zî Reqqa de ya û aye zî ameya rotiş. Cinîyan roşenî û lajekan zî seba şer perwerde kenî. Ez remaya û mi xo resna şerwananê YPGyî.”
‘PDK ma teslîmê DAIŞî kerd’
S.Hya 19 serreyî zî wina va: “Ez û pîyê xo kewtî destê çeteyanê DAIŞî. Çeteyî ma berdî Mûsil û dima ra mi û pîyê mi ma yewbînan ra cîya kerdî. Reya verêne ez Dêra Zor de ameya rotiş. Labelê pêynî nêbî û her kesê ke mi girewt mi rote kesêko bîn. Reya pêyêne zî ez bi kesê ke reqqayij rê ameya rotiş. Cinîyê sey mi zaf î. Êdî ez nêeşkayêne ke ewja de bivindera û ez remaya. PDK ma teslîmê çeteyê DAIŞî ke sey kutikan î, kerdî. PDK do bin guneyê cinîyan de bimano.”
BERÎTAN SARYA / ANF / DÊRIK