Kayanê şano yê dergan de, qewemyayiş an zî mesajê kaye, perde bi perde temaşevanan rê yenê qiseykerdiş. Çendêke cayî de yo nêzana la ke merdim rewşa Rojhelatê Mîyanênî bişibêno şanoye, kaya tewir zafperdeyî yena kayekerdiş. Xora Rojhelato Mîyanên de kayî dergê. Kaya merdimbîyişê merdimî, bica û biwarebîyişê merdimî, destpêka şaristanî, vecîyayişê çar olê pîlan, yewîn împarato- rîyê pîlî û alozîya heta ewroyî.
Verva Sûrîya êrîşê bi fuzeyan yê Emerîka yan zî bi vatişêko bîn, helamê “xo bidê ra kişte, axa ez a” çarçoveya alozîya Sûrîya de perdeyê hîrine akerd. Her çende perdeyî zaf rew dest pê kerdo zî, perdeyo yewîn rayvistinkerdişê DAÎŞÎ yê verva Îraq û Sûrîya, reyna verva DAÎŞÎ viraştişê koalîsyonê mîyannetewî û şerê wekaletî bi.
Perdeyê diyine bi dekewtişê Rûsîya dest pê kerd. Perdeyê diyine de wayirî,wekîlî, wekîlê wekîlan, îtîfaqî û neyaran yewbînî nas kerd. Qaso ke hewce kerdê însanî amey kiştiş, sîlahî amey cerebnayiş. Kam çi wazeno, wayir çi hêze û çi projeyî yo, bi qasêke eşkera bi. Perdeyê diyine de, seraktore Rûsya bî yan zî wina ameyê eysayene. Dayişqebûlkerdişê Esadî ro dinya û welatanê statîkoya hereme,pêvî- nayişê Astana ,helkerdişê meseleya Helebî û bi Erdoganî dayişeşkerakerdişê ortaxîya Dewleta Tirkîya û DAÎŞÎ.
Gelo perdeyê hîrine do perdeyê encamî bo yan nê, dîyar nîyo. Nîno zanayiş ke, kaye bi goreyê çend perdeyan ameya dîzaynkerdiş. La çiyo ke kifş o, îtîya ra dim do mîyaneka kaye, êdî hetê temaşekeran ra bêro femkerdiş. Îtîya ra dime do aktoro sereke Emerîka bo. Bê Emerîka do pel dare ro nêro war. Do êdî polîtîkayê dîzaynî eşkera bibê.Emerîka bi na game vat;”wa êdî her kes,linganê xo bi goreyê liheyfê xo raderg bikero”.
Na kaya de dewleta tewir bikelecane Tirkîya bî. Serre de Erdogan heme rayveranê Tirkîya, zê ”koro ke espije bidepêşno” qîray; "na bes nêkena, pancas- se fuzeyê bînan zî berzê. Esedî bîyarê war. Ke hetkarîyêke hewceya, ma hedreyê”. Erdogano ke qaşo verva îxanetê Emerîka û Dewletanê Ewropa bibi dostê Rûsya-Pûtînî, serokdewletîya Esedî ver çimanê heme dinya de qebûl kerdebî, xo vîrî ra kerd û “dosto erjîyaye” Pûtîn, şewêke de rot.
Dewleta Tirkîya dorêka bîne nîşanê heme dinya da ke “kingêrê ver vayî” ya. Dewletêka bêbawer û xoroş a. Va kamco kişte ra bêro a kişte ser şina. Bi na helwesta xo Rojhelato Mîyanên de goga lingan a. Do bi goreyê hêzê dîzaynkeran bêro bikarardiş. Do Emerîka bişirawo ver linganê Rûsya, Rûsya bişirawo ver linganê Emerîka.
Her hêzê bi goreyê xo encamêke,ney êrîşî ra vet.Do ewta ra dime zî bi no gore bêro têgeyrayiş. Îsraîlo ke heta nika bêveng bi, Îran nîşan da. Na yena meneyo ke do no mîr hema zaf awe bianco. Welatanê Ewropa û Kendawe bi awayêko pêroyî hetkarîya xo eşkera kerde. Na zî yena nê meneyî, Rûsya zî mîyan de, dîzayno peyên yê Rojhelatê Mîyanênî sero ameyo pêkerdiş. Do îtîya ra dime bi goreyê na polîtîka bêro têgeyrayiş.
Perdeyê hîrine de; Hêzê nêxoserî ke wekîltîye kenê, mecbûrê bi goreyê rolê xo têbigeyrê. Ya nê, ge-ge beno ke bi yanişî bibê hedef. Pûtîn do seba Tirkîya defterê kanan abikero. Beno ke bi yanişî kulê fuzeyanê emerîka serreyê Tirkîya de bêro hêdîkerdiş. Çareserîya persgiraya kurde do zafêrî rojdeme de bo. Seba Şarê Kurdî Perdeyê hîrine, zafêrî ver bi roşnayîye yo.