Her ke heqdestê kedkaran rê zam beno dima ra weşî, were, mazot û sewbîna lazimîyê merdimanî rê zî zam yeno kerdiş. Hukmatî zamê heqdestî yê kedkaran sey 404 TLyî dîyar kerd.Babet ser o karkerî qisey kerdî.
Can Baltayo ke karê pakkerdişî keno, wina va: “Tirkîya de karkerî sey kole yenê xebetnayîş. Rayîrê xelisîyayîşê karkeran yewîye ra vîyareno. Wa sendîkayî vera neheqîya ke karkeran ser de bena de bêveng nêmanî. Ez merak kena; gelo parlamenterê ke qerarê zamî dayî, eşkenî pê nê pereyî bicuyî?”
Talebê patronan beno
Ayhan Turalo sanayî de xebetîyeno zî wina va: “Hukmat, çîyêko pê kewçike dano ma, pê kepçe ma ra gêno û karmendan ser de şîdetê ekonomî ramneno. Talebê patronan yeno ca. Bacê karker û patronan yew a. Na zî dizdêya karkeran a. Pereyê ma şono herînayîşê sîlehan. Ma na qebul nêkenî.”
Seba dîyanet û mergî
Serekê DÎSK Genel -Îşî yê Şubeya Îzmîrî Alî Haydar Karayî zî wina va: “Merdim nêeşkeno pê heqdestê hukmatî bicuyo. Karmendî şertê seserra 18.yî de cuyenî. Verê cû 6 aşmî de reyêk zam ameyêne kerdiş, la AKP kerd serr de reyêk. AKP îqtîdarîya xo ya 15 serran de çîyêk nêkerdo. Îlîm rê nê Dîyanet, rant û mergî rê butçe ameya cîyakerdiş.
DÎHABER / ÎZMÎR