Cenîyan day zonayen ke, peyser antiş netîceyê nûmayişanê înan de bi û vatî, heta ke pêşnûme bi temamî rojdemê hikûmet ra vejero iyê dê kuçeyan terk nêkerê.
“Pêşnûmeyê Qanûnê Îstîsmarê Cinsî” peyser ancîya, la hona nîno zonayen ke do vûrnayişê seyî pêşnûme de bibê. Winî ayseno ke hikûmet bi temamî vûrnayişan ra fek nêverdayo. Cenîyê ke derheqê babedî de qisey kerdî day zonayen ke pêşnûme netîceyê nûmayişanê înan yê kuçeyan de peyser ancîya.
Ma nî kayan zaf dî
Parlementera HDP yê Stenbol û Verfeka Koma cenîyan yê Parlementoyî Fîlîz Kerestecîoglû, vist vîrî ke wexto ke tekoşîn bîro dayen peyser gam zî yena eştiş. Kerestecîoglû veng da cenîyan ke neyra tepya zî çimakerde bê û wina dewam kerd: “Zey ke pêşnûmeyanê verênan de kerdî, şenê ke pêşnûme biancê komîsyonî, bado ke rojdemê civakî ra kewt êşkenê meclîs ra ravêrnê. Çike ma nî kayan zaf dî. Nayî ra ganî ma tekoşîna xo de israr bikerê. Pîya hereket û tekoşîn kerdiş bi mane yo. Nayî zî peyser gam da eştiş. Zaf babedî estê ke pîya hereketkerdişê ma hewce kenê. Pawitişê domanan zî nayî ra yew a. Heta ke pêşnûme bi temamî rojdemê hikûmet ra vejero ganî ma pîya hereket bikerê.
Ma OHALî dirna
Endama Desteya Rayverîna Meclîsî yê Meclîsanê Cenîyanê Sosyalîst Zuleyha Mangan zî peyser antişê pêşnûme zey qezencekê muhîm hesibna û va, “Ma OHALî zî dirna û eşt çopî.” Mangan vist vîrî ke her cayê dinya de cenî îsyanî maye kenê û wina va: “Peyser antişê pêşnûme yê komîsyonî nîno no mane ke karê ma qedîya. Ma qet reyê pey ci nêverdanê. Êşkenê reyna bivûrne û bîyarê vernîya ma. Rixmê qedexeyanê OHALî û binçim girewtişan ma kuçeyan terk nêkenê. Ma dê pêrokîn qeraranê xo yê nûmayişî bîyarê ca. Herzewbîn na qanûn ra pîya ma dê yê ke na pêşnûme kerdî hadre û seveknay qet reyî xo vîra nêkerê.
‘Tekoşîn rê dewam’
Sekretera Cenîyan yê Halkevlerî Gulşah Ozturk zî ard zon ke heta ke na pêşnûmeya qanûnî bireso çopê tarîxî iyê dê tekoşîndayiş de dewam bikerê. Ozturkî vist vîrî ke zey cenîyê Halkevlerî ê zî bi pêro cenîyan ra pîya, bi rojano kuçeyan de yê û qîr kenê ke ‘Na qanûn do meclîsî ra nêravêro’. Gulşah Ozturk da zonayen ke ê pey vatişanê xo de yê û va, “hewale kerdişê komîsyonî bes nîyo. Heta ke ma nêvajê “qedîya” nêqedîyeno. Ma do cayo ke mendî ra tekoşîna xo biramnê.”
ANF / STENBOL