Hunermende Ayfer Duzdaşe bi serran o ke deyîranê kurdanê elewîyan arê dana. Duzdaşe estanikan ra heta vatişan, lawikan ra heta xeylê eseranê bînan arê dana. Duzdaşe na çarçewa de Xorasan ra heta Çorumî, Koçgirî ra heta Arguvanî xebatanê xo yê arêdayîşî ser o keyepelê Gazete Duvarî rê qisey kerd.
Duzdaşe va ‘cografya qederê merdimî dîyar keno’ û wina domnaye: “Cografya tarzê deyîrvatişê merdimî dîyar keno. Dayîkêk ke Cizîr de deyîr vana û dayîka ke Koçgirî de vana yewbînan ra cîyayêr vanî. Çimkî cografya tarzê cuyayîşê merdiman ser o tesîr kena û qirika merdimî bedilnena. Wexto ke ma şonî dewanê koyanê Meletî, ma vînenî ke ewja de hîna bi vengêko berz deyîran vanî. Labelê wexto ke merdim yeno dewanê deştan veng tayêna beno kêmî.”
Eke nêrî qeydkerdene, vînî benî
Duzdaşe dîyar kerde ke aye 2003 ra nata xebata arêdayîşî kena û wina va: “Mi xeylê deyîrî qeyd kerdî. Xora mi ê qeydan ra albumê Leylanî viraşt. Ez serra 2012î de kewta pey cinîyanê lawikvatoxanê Koçgirî. Mi lawikanê înan qeyd kerdî. Na xebate sey albumê Lawikê Koçgirîyî vejîya. Reyna mi xebata xo ya hîrêyine sey ‘Xorosan ra heta Çorumî deyîrê kurdanê elewîyan viraşt. Mi heta nika xeylê deyîrî qeyd kerdî. Seba ke na cografya de kulturê fekkî averşîyaye yo, eke nêrî qeydkerdene, heme vînî benî.
Xeylê herêman de xebata arêdayîşî
Duzdaşe daye zanayene ke aye herêmanê Semsûr, Gurgûm, Koçgirî, Meletî, Meletî, Gimgim, Çorum, Amed, Cizîr û sewbîna herêman de gêraya û deyîrî qeyd kerdî. Duzdaşe va ‘ez şîya cayê ke Elewîyê Kurdî tede zaf î û mi deyîrî qeyd kerdî’ û wina dewam kerde: “Mi nê cayan de xeylê eserî qeyd kerdî. Hema vaje ez şîya heme dewanê qezaya Arguvanî ya Meletî. Reyna ez şîya Cizîr zî. Eke ma sponsor bivînî, ma do dest bi viraştişê ‘Deyîrê Arguvanî’ albumêk bivirazî. No het de ma veng da xeylê kesan, Ma bawer kenî ke do netîce bigîro.”
AMED