Ege û Almanya ra vera Kurdistan
Di cenîyê enternasyonalê xoverder. Di zerrîyê ke bi eşqa serbestî day piro û heskerdoxê mordemîyê: Ûta û Amara. Jû hetê Ege ya Tirkîye ra kewna ray, a bîn zî Almanya ya Avrupa ra. Nê di cenîyê ke dûrê Kurdistan de ameyî dinya dawa serbestîya kurdan de resenê pê û şexsê tekoşîna kurdan de verva zordestî û bêedaletî tekoşîna mordemî danê.
Perîkeyna: Amara
Ekîn Ceren Dogrûak bi nameyê silasnayî Amara aşma Çile ya serra 1981î de Enqera de amê dîna. Amara ya ke eslê malbata xo hetê Ege ra ya wexto ke zangeh de beşa sosyolojî wanena tekoşîna azadî yê kurdan pêhesena û silasnena. Bahdê na silasnayişî hinî kes nêşeno vernîya Amara bigîro. Endî Amara bena jû aktivîsta aktîf ya gurenayisê tekoşîna serbestî yê cenîyan û şaran. Amara ebe gurenayisê hereketa gencan û hereketa ceniyan destpa şoreşgerîn kena. Wextekê kilm ra dima kî yena pêguretene. 2005 de vejîna teberê welat, Awrûpa. Na perîkeyna ya ke zerrîya ci ebe serbestî dana piro, raywana heqîqetî, ebe alwoza xo ya Alman Ûta Schneîderbanger verê xo dana koyanê Kurdistan.
Zerrîya kapîtalîzmî ra qerfnayiş
Ûta Schneîderbanger ya ke bi nameyê bîn Nûdem zî zey alwoza xo Amara verva sîstema kolonyalîst û serdest kûna ray û tekoşîna kurdan de cayê xo cêna. Ûta zî her tim ard ziwan ke edalet, serbestî û demokrasî do ebe tekoşîna kurdan bîro. Ûta 20ê Temmûze 1961an de Almanya de yena dinya. Zerreyê sîstema kapîtalîst de bena gird la her tim cuwyayişekê kolektîf û serbestîyê geyrîya û eleqeyê xo bi sîstemê kapîtalîst ra qerfna.Pey serbestî de geyrayişê Ûta, dûştê sîstemê emperyalîst, faşîst û serdestî de ay keno cenîyeka tekoşer û xoverder. Ûta senî ke sîstema zordestî ya verva cenîyan fehm kena kewna hereket û bena jû aktîvîsta tekoşînê serbestîyê cenîyan.
Bi heskerdiş yad benê
Ûta Schneîderbanger finêşina hetê Tirkîye, neheqî û bêedaletîya verva kurdan vînena û xo kena nezdiyê tekoşîna serbestîyê kurdan. Uta serra 1994 de sona Dersim û bi raya hevalê xo malbata Delîl û Mazlûm Doganî şinasnena. Na naskerdene ayê sero tesîrekê girs kena û xo resnena koyanê Kurdistan. Jû alman, jû tirk nê hurdî ceniyê enternasyonalî 31ê Gulane 2005î de mintiqeyê Vajûrê Kurdistan Qeladizê de, netîceyê qezayê trafîkî de weşîya xo kerd vinî. Badê 11 serran şarê kurd û alwozê ci yê tekoşînî nê hûrdî taqîpkarê heqîqetî bi vîrkerdiş û heskerdişekê gird yad kenê û sozê ca ardişê xeyalanê înan anê ser zon.
NAVENDÊ XEBERAN