Domanê 12 serre Ûgûr Kaymaz 21'ê Mijdara 2004’î de bi îdiayê ‘Terorîst o’ pîyê xo ra pîya, bi 13 guleyan ame qetilkerdiş. Kiştoxanê Ûgûr û pîyê ci bi behaneyê “Pawitişo meşrû” bêceza mendî û derheqê înan de mehkeme qerarê beraatî da. Qeyûmo xespkar ke tehamulê peykerê Ûgûr Kaymazî nêkerd, 10ê Hezîran de bi TOMA û wesayîtanê zirxî peykerî hewada.
Dawaya Ûgûrê qijkek hinî bî malê rayapêroyî yê Tirkîye.Mehkemeya Heqanê Merdiman a Ewropa derheqê dawa de Tirkîye mehkûm kerd û qerarê “Heqê cuye ame îxlalkerdiş” da. Ser nayî serpirodayîşê seba “Newe ra mahkemekerdiş” bê sebeb ame redkerdiş. Dawaya Ûgûrê qijkek hinî bî malê rayapêroyî yê Tirkîye.
Bi kepçe wedarnay
La bêhuqûqî û hêrîşê dewlet bi nê kerdenan bisînor nîyê. Par, 21ê Mijdare 2016î de zî maya Ûgûrî Makbûle Kaymaz hetê qeyûmê xespkar Ahmet Odabaşi karî ra amê eştiş. Nika zî eynî qeyûmî peykerê Ûgûrî cayê ci ra wedarna. Şaredarîya Qoser serra 2009’î de bûlvarê sûk de seba vîrardenê Ûgûrî, peyker rona. Qeyûmo ke tehamulê peykerî nêkerd, 10ê Hezîran de bi TOMA û wesayîtanê zirxî peykerî hewada û hurendîya ci de quleyê seat rona. Qoserijan nêrazîbîyayîş damûsna.
‘Peykerî çi zirar da şima?’
2 peykerê ke beyran lepê ci de bî, hetê kepçeyan amey wedarnayen û berdîyay cayekê nêdîyar. Peykerê ke hetê mamoste Kamûran Aydogan ra amey viraştiş, 10ê Hezîran de, wextê fitarî de amey wedarnayen. Qoserijê ke nayî rê nêrazîbîyayîş damûsnay, aşkere kerdî ke dewlet domananê Kurd ra zî tersena.
Welatija bi nameyê Hiznegul Kavak dîyar kerd ke hikûmet bi tayînkerdişê qeyûmî îradeyê şarî xesp kerdo. Kavak bi persa “Ka no peykerê hurdî domanan çi zirar da şima ke şima rîwalê çi wedarna? hêrsê damûsna.
Peykerî ra zî tersenê
Hiznegul Kavak vist vîrî ke waştenê dewlet qedênayene Kurdan o û aşkere kerd ke qeyûm çi yeno fikrê ci ey keno û şarî rê teba pers nêkeno. Kavak peynî de dîyar kerd ke peykerê domananê Kurdan ra zî tersenê.
‘Kotî de nameyêk Kurdî bibo xirab kenê’
Qoserij Mehmet Sirac’î zî da zanayîş ke wedarnayîşê peykerî ser waştişê şarê Qoser nêbi. Siracî wedarnayîşê peykerî zey zilm bi name kerd û va, “Hama kotî de nameyêk Kurdî û kulturê Kurdî bivînê xirab kenê. Ka seba wedarnayîşê peykerî kamî ra pers kerdî, ma ra pers nêkerdî.”
‘Peykerê haştî wedarnay’
Orhan Başboga’yî zî dîyar kerd ke ê wedarnayîşê peykerê Kaymazî qebûl nêkenê û bi nê vatişan nêrazîbîyayîşanê xo damûsna: “Peykerêk haştî bi û ti zerar nêda kesî. Yeno waşten ke kiştişê Kaymazî bidê vîra kerdiş û kulturê Kurdan werte ra wedarnê. Ez veng dana Kurdistanijan ke nê kerdenan qebûl nêkerê.
MÊRDÎN