Çalakîya Nobeta Edalet û Wijdanî yê HDP yê Wanî roja çarin de ramena. Heto bîn ra dingê peyên Îzmîro ke do nobet dewr bigîro ra vengê tewrbîyayîşê çalakî ame dayen.
Nobeta Edalet û Wijdanî ke Parka Mûsa Anterî de ramena, vizêr zî raştê eleqe û zîyaretan amê. Badê zîyaretan Verfekê HDP Osman Baydemîrî ke qisey kerd vist vîrî ke Erdogan sodir, nêmroje, şewe tewr tayn roje 4 reyî zûrîyan keno.
Baydemîrî vist vîrî ke sîyaset wareyê peydakerdişê çarekerdişê problemanê komelkî yo û va, “Eke însan kişta demokratîkbîyayîşî ra biewno, sîyaset çerekerdişê bi rayîra dîyalogî yo. Sîyaset neyartî, dişmenî nîya.
Îqtîdar însanan keno qilêrîn
Baydemîrî vist vîrî ke mîyanê ti demokrasî de nêameyo dîyayîş ke serdestî nîro rexnekerdiş û wina va: “Eke lîderêk werzo rexneyanê vera xo zey xîyanetê vera welatî bihesibno, endî nameyê neyî dîktatorîye ya. Her cayê dinya de, serdestîya bi tenya sereyê xo, însanan qilêrîn kena. Û şima Serokê Pêroyî yê AKP, no 15 serrî yo no welatî de ser hukm de yî. Û îqtîdar însanan keno qilêrîn. Nêbeno ke şima her rexneyêka hemverê xo zey xîyanetê vera welatî biname bikerê.”
‘Şima damûsnenê ke şima têk şîyê’
Verfekê HDP Osman Baydemîrî îqtîdarî rê va, “No 4 serrî yo şima têk şîyê. Çike wexto ke însan ray ra kewno, erjê însanan esthe. Şima nê erjan, seba xatirê mendişê îqtîdara xo orte ra wedarna. Ka şima bi wedarnayîşê rewşa îstîsnayî îftîxar kerd. Rewşa îstîsnayî tewr peynî de 6 sûkan de mendbî. La nika 81 sûkan de rewşa îstîsnayî esta. Şima werzenê parlamenterê weçîniteyî, hemşaderan erzenê girotxaneyan. Bi nê kerdenanê xo, şima xo ra damûsnenê ke şima têk şîyê. Ka şima do hemverê wesayeta leşkerî de têkoşîbaya. Wesayeta leşkerî bi saya têkoşîna ortax ê quwetanê demokrasî qediya. Labelê şima wesayetêka newî ya faşîzan ard.”
Baydemîrî va, helbûkî şima goş dabîya vengê mûxalefet, vengê Demîraşî, vengê nuştoxan û roşnvîran, şima do qilêrîn nêbîyayba û aşkere kerd ke, “Demokrasîyêka bê mûxalefete, demokrasî nîya. A hinî bena rejîma şexsêkî. Rejîma şexsêkî zî peynîya ci do husran bo.” Tewr peynî de Baydemîr va, “Seba pêro qilêrîn pake bibo, seba hona vêşî na welatî rezîl nêkerê ma dê vernîya faşîzmî bigîrê.”
Meydanê Gundogdu amade yo
Heto bîn ra Îzmîr a ke do nobet dewr bigîro de hadreyînê peyên yenê ramitene. Teşkîlatê HDP yê sûke derheqê çalakî de kombîyayîşê çapemenî viraşt. Hemseroka Sûke yê HDP Gulay Gun Bîlîcî ke îzahat da vist vîrî ke iyê dê 15ê Tebaxe de Meydanê Gundogdu de destpê Nobeta Edalet û Wijdanî bikerê. Bîlîcî vengê “Vera faşîzmî têkoşîna ortex” da Îzmîrijan.
WAN/ÎZMÎR