Tornê Ecdadî onca misna ma. Misna ma ke, o Ecdadê xo yê gonewerî ra dûrî niyo. Xeta Ecdadê xo dero.

Serokwezîrê tirkî Recep Tayyîp Erdogan hora par, kongra partiya xo de namê Yavuz Sultan Selîm û namê Alpaslan dard bî we.
Bi wedardayena namê Alpaslan mesaj da Kurdan. Bi namê Yavuz Sultan Selîm zî mesaj da aleviyan.
Kurdan ra vat “na dugele de qeyta jû heqa sima çîna.”
Aleviyan ra zî vat “şîmşerê Yavuzî ma dest dero, vengê xo mevezê.”
Nika namê pirdî Yavuz Sultan Selîm na pa û vatîsê xo yê parenî hebena kerdî miqerem, kerdî zelal.
Namê jû gonewerî na pird dayene, yena manê faşîzmê rutûrupalî. Zovîna manê xo çîno. Mesaj zelal o. Odetê na dewlete qeyta nêvurîno.
AKP belka dewlete ra hêfê xo cena, hama seweta qom û îtîqatanê bînan tewa nêkena. Bîrûbazarê AKP de niyo, Yavuz Sultan Selîm aleviyan rê se kerdo, çond alevî qirkerdê.
Yê AKP ke qisaweta xo ya niyanene bîbiyenê, namê qetilkaranê bînan cade û kolanan ra dardenê we.
Namê qetilkaran mordem her ca vîneno.
Namê Ataturk, Îsmet Înonu, Celal Bayar, Fevzî Çakmak, Abdullah Alpdogan û Sabîha Gokçen her ca de vejînê vireniya mordemî.
Nî pêro qetilkarê qomê Dersîm yê. Dersîm de namê nînan dê rayan, mekteban û cadan.
Siyasetvanê tirkî her tim raya Ecdadê xo ramenê, kamij partiye ra benê, bibê.
Ecdadê xo çiqas gonewerî benê bibê, sîyasetvanê tirkî înan rê wayîr vejînê.
Ataturk û Îsmet Înonu ma qirkerdîme, ma reyê xo da ci.
Demê Ecevît de alevî ameyî qirkerdene, ma reyê xo da ci.
CHP qetilkara aleviyan a, ma reyê xo dame ci.
Kemal Kiliçdaroglu bî serokê na partiye, kamiya xo înkar kerde, îtîqatê xo înkar kerd, ma rey dame ci.
Pekî alevîke na halderê û xorê wayîr nêvejînê, kam cirê wayîr vejiyo ke.
Recep Tayyîp Erdogan hora aleviyan rê wayîr nêvejîno. Çike zoneno ke dewlete aleviyan çiqas qirkena bikero, taye alevî her tim lewê dewlete derê, dewlete ra nêvişîne,
Ma, alevî gune endî na dewlete ra û partiyanê na dewlete ra bivişîme ke, jû kamiya bibo.
Eke kamiya ma nêbiye û ma devam ra na dewleta qetilkare dima şîme, ne derdê ma qedînê, ne kes ma qebul keno.