No vateyê Şêx Abdurrehîm o. Şêx Abdurrehîm birayê Şêx Seîd bi. Wexto ke he Serewedaritişê Şêx Seîdî dest pê nêkerdibî, eskerê tirk şinê Pîran, erzenê ser keyeyê Şêx Abdurrehîmî. Wazênê lez û bez yew provokasyon birazêne û bêhadretîyê verênîyê Serewedaritişê Şêx Seîd bigerêne. Xora ay çax Şêx Seîd zî keyeyê birayê xo de yo. Eskerî erzenê keyeyê ser vanê: “Tîya de tayê merdimî estî, eskerîyê xo nêkerdî, ma ameyê înan bigerê û berê eskerîyê.” Şêx Seîd vano: “Tîya de merdime hina çinê, nika ma tîya de mêywanê yê (mêmanî). Şima dima ra bêrênê hîna rind beno.”
Çend hebî eskerê tirkî yenê kiştiş
Eskerê tirk qet goşê xo nêdano qiseyê Şêx Seîdî, hêrişê Pîranijan keno. Şêx Abdurrehîm vano: “Pirodê paşa çino”. Tîya de Şêx Abdurrehîm eşkera vano ke: “Ma zilmê dewleta tirk û sermîyanê aye nêwazenê. Ma paşa-maşayê tirk zî nêwazenê. Ma wazenê bi xo îdareyê xo bikerî.” Senî Şêx Abdurrehîm hina vano, pîranijî zî mecbûr manenê xo pawêne. Çend hebî eskerê tirkî yenê kiştiş û ayê bîn zî esîr kewnê destê pîranijan. Provokasyon virazyeno û provokasyon dima ra Serewedaritişê Şêx Seîdî dest pê keno.
Dewleta tirk, Serewedaritişê Şêx Seîdî ra hetanê nika sersere ma û welatê ma de her tewr dagirkerîyê kena. Her tewr zilmî ramnena. Zilme ke dewleta tirk kena nimûne û mîsalê eyê çino. Nika he xidartir zulmê kena. Zereyê kuçeyan de tut û domanê ma kişena. Baran Çagli yê 7 serreyî bi. Cizîr de hetê dewleta tirk û AKP ra ame kiştiş. Mazlum Turan 16 serreyî bi. Qoser de hetê dewleta tirk û AKP ra ame kiştiş. Aşma hezîrane ra hetanê nika dewleta tirk, 95 kurdî kiştî. Zereyê nêy kurdan de qij, pîl, cinî û kalî estî. Dewleta tirk zilmê xo de texsîr nêkena. Gera şarê kurd zî xoverdayîşê xo de texsîr nêkero.
Kurdistano Azad
Biewnê Sakîne Arat a 80 serreyî se vana. Vana ke: “40 serre yo ke ma hetanê nika vanê aştî û aştî. Gera ma tîya ra pey bayîyê aştî nêvindere. Gera ma seba aştî şer bikerê.” Gereka her kes vatişê Sakîne Arat ra ders bivejo. Aştî bê xebat nîno. Aştî bê tekoşîn nîno. Aştî bê xoverdayîş nîno.
Eger şarê kurd çengê xo bierze ver pistîne xo bivindero, zilme dewleta tirk zî nêvindeno. Do Dewam bikero. Seba ke ma paşa û maşayê tirkan xelas bibî, seba ke ma Kurdistano Azad awan bikerî, gera pêronê şarê kurd xoverdayîş bikero. Gereka dew bi dew, mehla bi mehla, qeza bi qeza û şaristan bi şaristan xoverdayîş bibo. Tena pê Gever, Silopî, Gimgim, Licê û Cizîr Kurdistano Azad nêvirazyeno. Wexto ke Kurdistan pîya wirzo ser lingan, Kurdistano Azad zî lez awan beno.