SILAVA ÎBRAHÎM /ANHA / HESEKÊ
27ê Teşrîna peyêne Roja Awanbîyayîşê Partîya Karkeranê Kurdistanî (PKK) yo. Emser serrgêra 40. yê PKKyî yo. Her serre serrgêra PKKyî xeylê cayanê Kurdistanî de yeno pîrozkerdiş.
Babete ser o Endamê Îdarekarîya Akademîya Komelo Demokratîk Ebdilxanî Osoyî qisey kerd. Osoyî qiseykerdişê xo de serrgêra awanbîyayîşî pîroz kerd û wina va: “27ê Teşrîna peyêne seba heme şaranê Rojhelato Mîyanênî pîroz o. Na partî û erjê aye bi fikir û felsefeya Rayberê Şarê Kurd Abdullah Ocalanî yeno îdarekerdiş. Kesê ke fikrê PKKyî bişinasnî, raştîya cuya azade zî şinasnenî.”
Osoyî dewamê qiseykerdişê xo de va ‘herçiqas ke Sûrîye de xeylê partîyê kurdan awan bîyî, labelê reyna zî ser maneyê kurdan de tena bîyî bar’ û wina domna: “Bi saya PKKyî kurdê Rojawanî heta nika qezencê girdî bidest vistî. Bi fikir û fedakarîya şehîdê Tevgerê Rizgarîya Kurdistanî Vakurê Sûrîye cuya aştîyane cuyeno. Şerwan û xoverdakaran tena zorê terorî nêberdî, bedilîyayîşê muhîmî zî kerdî.”
Heme dinya rê bîyî finak
Osoyî qala rolê cinîyan zî kerd û wina va: “Ewropa û Rojhelato Mîyanên de xeylê partîyî ameyî awankerdiş. Nê partîyan de rêjeya cinîyan se ra 20î derbaz nêkerdo. Labelê mîyanê Tevgerê Azadîye de destpêk ra heta nika beşdarbîyayîşê cinîyan dûşto tewr berz de yo. Cinîyê Rojawan û Vakurê Sûrîye êdî nîşanê heme cîhanî dayo ke bîyî wayîrê hêz û heme dinya rê bîyî finak.”