TOPRAK EREN / ANF / BEHDÎNAN
Mazdek Ararat (Omer Bagci) 13ê Êlula 2019î de wexto ke wezîfeyê xo ser o bi, netîceyê qezayêkê trafîkî de wefat kerdbi. Ararat qezayê trafîkî ra dima 14ê Êlule de Şehîdgehê Şehîde Dîcle ya Kobanê de amebi definkerdene.
Komîteya Kultur û Hunerî ya PKKyî bi wesîleya şehadetê Araratî îzehetêk da û Ararat vîr ard. Komîteye îzehetê xo de qala qezayê trafîkî kerde û wina vato: “Ma şarê xo rê û keyeyê hunermend û milîtanê azadîye yo erjaye embaz Mazdek Araratî rê ke Rojawanê Kurdistanî de rîyê qezayê trafîkî ra wefat kerd, serweşîye wazenê. Embazê ke nê qezayî de birîndar bîyî rê zî derbasî bo.”
Komîteye dewamê îzehetê xo de bale ante qezayan ser û wina dewam kerdo: “Gama ke ma musayê embazê ma rîyê qezayê trafîkî ra wefat kerdo, ma hîna bîyî xemgîn. Bedildayîşê rayîrê şorişî de erjêko tewr pîl o la no normal nîyo ke qezayê trafîkî hendek zaf qewimîyenê. Par doktora şorişgêre ya enternasyonalîste ya arjantînije Alîna (Legerine) zî qezayê trafîkî ver wefat kerd. Aye ra ma vanê tedbîrê ke qezayanê trafîkî kêmî bikerê, hetê Îdareyê Xoserî ra ameyî girewtene, bi hewayêkê binizamî her ca de bêrê kerdene. Ganî şarê ma na babete de bêrê perwerdekerdene. Binê her qezayî de yew peygoşkerdiş û bêqaydetî esta. Ercê dîsîplînî ercê cuye yo.”
Ma ey bikerê wesîleya serkewtişanê girdan
Komîteye peynîya îzehetê xo de wina vato: “Na çarçewe de ancî ma veng danê xebatkaranê hunerî û embazanê xo ke ma bi welato azad cewab bide vîrameyîşê Mazdekî. Ma ey bikerê wesîleya serkewtişanê girdan! Naye ra ma vera vindertişê bêqaydetîye û qezayê trafîkî yê Kurdîstanî û teberê welatî de bikerê sembolê komelê hişmend, demokratîk û kulturî yê cuya biqayde.”