Yeno peyen polîsê AKP Gever (Yüksekova) de 2 esnafî qetil kerdî. Nînan ra Veysel Îşbîlîr 34, Mehmet Reşît Îşbîlîr zî 32 serren bî. Polîsê AKP merasîma cenaza Veysel û M. Reşît Îbîlîr de çeneka 25 serrene Bêmal Tokçu zî giran kerde dirvetin. Ravêr ma vatenê dewleta xoriye onca kewte dewre. La nika no arguman endî ranêvêreno. Çike dewlete cer ra bi car, çep ra bi rast pêro binê limê AKP dera. Qetilkarê nî hurd welatparêzan  dewleta AKP ya, polîsê AKP yê.

Quwetê tîmên taybetî demê pêro hukumatanê tirkî de na kar kerd, demê AKP de zî na kar kenê. Adetê dewleta terorîste na wo. AKP zî her tim na dewleta gonewere rê wayîr vejîna. Naca de mavênê hukumatanê virenan û AKP de ferq çîno. Serokwezîro tirk Recep Tayyîp Erdogan her tim vano “Polîsê mi, eskerê mi…” O waxt qetil kerdena nî hurd mordeman ra zî hetê siyasetî ra sermiyan o.
Siyasetê AKP yê “demê haştiye” makyaj o. Mezelê şehîdanê ma bîle na dem de quwetanê dewlete rê biyê hedef. Çond asmî yo quwetê dewleta AKP erzenê mezelanê şehîdanê kurdan ser. Quwetê AKP merdanê ma bîle rehet nêverdanê. Nika Gever de zî hen bî. 2 asmî yo mezelxaneyî hete quwetanê dewleta terorîste ra yenê xirave kerdene. Bi maskê dînî AKP kurdan rê en zulmo girs kena.
AKP de ne vîjdano dînî, ne zî vîjdano siyasî esto. Zalimî her roz demokrasî ra qesey kenê, hama nêverdanê kes heqanê xo yê demokratîk biyaro kar. Her numayîs de polîsê AKP bi gaz û çekanê bînan erzenê numayîskaran ser, qetil kenê. Demê çalakiyanê Gezî de ma dî ke AKP heqanê demokratîk kar ardene rê texamul nêkena.
Polîsê AKP demê Gezî de 6 numayîskarî qetil kerdî, 8hezar ra jede însanî kerdî dirvetin. Nînan ra 59 mordemî giran dirvetin yê. Onca polîsê AKP aynî dem de 13 çalakvanê Gezî kerdî kor. Nînan ra leto jede gencê alevî bî. Dima nutik Mehmet Metîner vejiya vat: “Cemxaneyî biyê halênê terorîstan.” Raştiya AKP na wa.
AKp haştiye û demokrasî nêwazena. AKP bêvengiye wazena. Se beno bibo, gune kes vengê xo nêvezo. Hedefê AKP na wo.
Seke nêvat, AKP heto jû ra merdanê ma mezele de rehet nêverdana, heto bîn ra zî hepisxanan de mehkumanê nêwesan teslîme merdîs kena. Demê serdestîya AKP ra na het nejdiyê 2hezar mehkumanê nêwesan hepisxanan de weşiya xo kerda vîndî. Çike Hukumatê AKP nêverda nî mehkumî tevera tedavî bibê. Numune: 2010 de 252 mehkuman, 2011 de 268 mehkuman û 2012 zî 260 mehkuman hepisxanan de weşiya xo kerda vîndî. Nî moreyî wezîrê adaleta tirkî Sadullah Ergîn, persê parlamentera BDP Ayla Akat Ata ser meclîse de  kerdî eskera. De haydê bêrê haştiya AKP!