SAFÎYE ALAGAŞ / JINNEWS / AMED
5ê Hezîrana 2015î de vera mîtînga HDPyî ya Amedî de hêrişêko bombeyin bîbî û netîceyê ci de 5 kesî merdbî û bi seyan kesî zî birîndar bîybî. Nê birîndaran ra yewe zî Derhênere Lîsa Çalana ke her 2 lingê xo vînî kerdbî, bîye. Çalane 2 serrî ra pey îfade daye Serdozgerîya Komare ya Amedî.
Çalane îfadeyê xo de dîyar kerde ke kewtişê mîtînge de ti kontrol çinêbî û wina va: “Wexto ke ez ver bi Rasteyê Îstasyonî şîyêne, hetê dezgeyê çaygerêkî de vindeta. Mi piştîya xo da dezgeyî, 5 deqa ra dima keso ke seba hurdîkerdişê pereyî ame, çimê xo mi rê qurmiçna. Ez hereketê nê kesî ver etirîyaya, no kes senî hetê ma ra dure kewt, bombe teqaye.”
Çalane dewamê qiseykerdişê xo de wina va: “Teqayîş ra dima ez neqlê nêweşxaneyî bîya û mi 2 lingê xo vînî kerdî. Goreyê mi têkilîya çayger û keso ke waşt pere hurdî bikero, esta. Ez wazena ke îfadeyê çaygerî bêro girewtiş. Ez her dîyan ra zî gerrekar a. Reyna nêweşxane de çayger hetê polîsan ra ameyêne pawitiş. Ez wazena no xusûs ser o cigêrayîş bêro kerdiş. Ez Burhan Gok, Îlhamî Bali, Îsmaîl Korkmaz, Mustafa Kilinç, Orhan Gonder ra gerrekar a.”
Avûkatê Çalane Ferhat Çelîkî zî dîyar kerd ke ê derheqê kesê ke bîyî sebebê birîndarbîyayîşê muwekkîlê ci de gerrekar î û wazenî ke wa derheqê nê kesan de doze bêro akerdiş.