DÎLHAN YILMAZ/ŞÛJIN/AMED
Mufredatê perwerdeyî ke seba 2018-19 ameyo amadekerdiş, objektîfî û rixnekarî ra dûrî yo. Reyna dersê ke girewtişê înan ameyo mecbûrîkerdiş, şîddet û cîyakarî mîyanê xo de hewênenî. Tayê dersan de babetê ilmî ameyî vetiş û herinda înan de dersê dînî ameyî dekerdiş. Dersê dînî zî seba resnayîşê merdimanê sunîyan ameyî raştkerdiş.
Nê mufredatî ser o demê peyênan de xeylê munaqeşeyî yenî kerdiş. Îdarekara Cemxane û Komeleya Kulturê Pîr Sultan Abdalî ya Amedî Nurşen Akbage qisey kerde û vînayîşê xo arde ziwan.
Mekteban de mescîdî mecbûrî yî
Akbage vist vîrî ke ‘polîtîkayê asîmîlekerdişê elewîyan awanbîyayîşê Komare ra nata dewam kenî’ û wina dewam kerde: “Mufredatan de elewîyî nînî dîyayîş. Wexto ke Komare awan bîye, elewîyî vatî qey do heme çîyî bibedilyî. Wextê CHPyî de tayê sozî ameyî dayîş, labelê heta nika ti îqtîdarî no het de dersanê dînî mecbûrî ra nêvet. Bi hezaran merdiman muracatê tayê cayan kerdî ke domanê înan dersê dînî nêvînî. Mekteban de mescîdî mecbûrî yî û no nîno qebulkerdiş. Eke wina bibo, do mabênê domanan de cîyayî bibî. ”