Haştiya civakî xirab kenê
Alîkarê Serokê Komeleyanê Kiltûr yê Alewiyan Mîkdat Ozturk’î aşkere kerd ke, vatenê niyayî provakatîfî yê û vist vîrî ke, herbê mezhebî yê Rojhelata Miyanî ra ciya niyê. Ozturk’î vist vîrî ke, vera alewiyan vatenê nîjadî jêde biyê û hewildayenê xirabkerdişê haştiya civakî yê. Ozturk’î ard ziwan ke, gune leteyê bîn yê civakî nê vatenan ra nêrazîbiyen damusnê, paşt bidê alewiyan.
Serokê Şûbeyê AKD yê Edena Mûrtaza Moroglû zî aşkere kerd ke, vatenê nîjadî meseleyê zihnîyetî yo û va, na dawa 1400 serrî yo ramena. Moroglû vist vîrî ke, miyanokê Îslamiyet veng-tol kenê, tarix ra heta nika, Îslamiyet, Misilmantî û Quran’î goreyê menfeatanê xo şixûlnenê û niya va: “Hona kî kitabanê diyanetî de alewitî zey mezhebê da ’meczûp’ yeno damusnayen. Cok ra, gerek cemeatê sûnnî dest bierzo na mesele.
Pîrê alewiyan Zeynel Kete kî vist vîrî ke Komara Tirkiye ser zihnîyetê jûyiyî roniya ya û da zonayene ke, diyanet kî lingê îdeolojiya na zihnîyet o. Derheqê fetvayanê peyenî yê diyanetî de Kete niya va: “Hewl danê refleksanê alewiyan biancê dustê Îslamiyetî. Bi nay şenê hetê şerîatciyan, DAİŞ û yê bînan bidê şikiten. La alewî biyayişê xo ser hemveriya Îslamiyet ronêna yo.
Diyanet ciyakerdiş rê çenax tepêşena
Kete vist vîrî ke, problemê alewiyan ebi Îslamiyet çinyo û niya va: “Alewî civaka ke, xeta demokratîk yê zereyê Îslamiyet, vindertişê Şêx Bedredîn û Huseyîn’î ardene na rojî yê. Nayî ra, fetvaya ke dewlet dana alewiyan eleqedar nîkena. Çike alewî him hetê îdeolojîk, him kî zey sazgeh girêdayê diyanet niyê. Kete vist vîrî ke, alewî diyanet ra xîzmet nêgînê, nayî ra gune yê ke girêdayê diyanetî yê, nê fetvayan rê nêrazîbiyen damusnê.
Kete da zonayene ke, nika herb yeno cuwyayiş û diyanet kî no herbî de xoser niya. Kete aşkere kerd ke, diyanet rolê Wezîrê Pawiten kaykena, hetê îdeolojîk polîtîkayanê ciyakerdiş ra çenax tepêşena. Him zey dîn, him kî zey ziwan misyonê da niyayî yê diyanet esto.
DÎHA/EDENA