Ez û Xelef ma a erebeya sipîye derîme. Nê mabênî de Şengalijî pêro erebeyan ra vanê tirêmpêl. Raya ke deştê ra êna serê koyê Şengalî, raya asfalte ya tenge, tawo ke Derîyê Gelîye ra êdî kewena zereyê koyê Şengalî, raştî kî mordem vano qey hama koyê Şengalî zereyê xo ya do Şengalîjî guretê zereyê xo, dest kena ci sey marî çerexîyena. Çerexîyena û çerexîyena. Heta Çilmêra çerexîyena. Her ke şona bena berz. Çilmêra gilê koyî yo. Na raye verê de dewleta Iraqî viraşta. Seba Şengalijan nêviraşta. Seba ke koyê Şengalî de eskeranê xo û muhîmatanê eskerî bi ca bîkero viraşta. Xora Çilmêra cayê fuzeeştîşî bîyo. Nika cayê şerwananê Şengalijan o.
Cayo ke ez cira vana zereyê Şengalî Serdêşt o. Rakimê xo berz o. Hem Serdêşt o û hem kî serê koyî yo. Serê koyê Şengalî yo. Şengal koyode derg o. Yanê hetêk ra serê koyî yo. Peyê fermanî Şengalijan xo êşto îta, xo êşto zereyê Şengalî. Şengal kî çiqas ci ra ameyo ê seveknayê. Koyê Şengalî Şengalijî seveknayê la nêşikîyo bê dirbete Şengalijan bisevekno. Şengalijî giran bîrîndar bîyê. Dirbeta Şengalijan zaf giran a. Zaf xedar a.
Xelef kî ê rojan ra vîyart o. Ge-ge, ez cesaret nêkena dirbeta înan bikinî la reyna kî ge-gane bêçika xo hêdîka nana ser. Ge-gane kî ê bi xo qalikê dirbeta xo qeşêrnenê. Zanênê do ci ra gonî û goneşîrê şoro la reyna kî qeşernenê. Ya raste ê kî hêdîka kinenê. Tenê hêdîka kinenê la şima gonîya ke ci ra şona bivînê!
Ma verê erebeya sipîye da holika meclîsî. Heta cayo ke ereba şîkîye şoro ma pê şîme peye cû pêya bîme û pêyatî şîme. Bala mi ant cayêk de zaf zêde qapaxê şaşalan est bî. Ez matê ci menda. Mi pers kerd, mi va: “Nê hende qapaxî çikê îta kotî ra amayê?” Xelefî verê xo da mi û va: “Nê qapaxê şaşalanê awe yê, Çarşema Sora Serê Nîsanê ra mendê” Mi cewabê xo guretbî, ez bi hêrs ser pakîya der û dorî ser fikirîyênê ke Xelefî va: “Ti zanena, ma fermanî de bi qapaxê şaşalî awe dayênê domanan.”
Bi mi ra ne hêrs mend ne kî çîyode bîn. Ez cayê xo de cemedîya. Hînî bî, demêk ge-gane nê tim, her çîyî, girs, qic dirbeta Şengalijan qeşernayênê. Derdê Şengalijan tevdayênê.