Badê ke qayûm tayînê Şaredarîya Bajarê Girdî ya Amedî bî, şaredarî bedilîya qereqol. 2 serran de her yew personelê şaredarî tewrê kêmî hezar û 132 reye nuqtayê cigêrayîşî yê şaredarî ra ameyî derbazkerdiş. Goreyê proseduran, ganî badê namzedî Atîlla îstifa bikerdêne, la hema zî kar ser de yo.
11ê êlula 2016î de qayûm tayînê 24ê ci yê Partîya Herêmê Demokratîkî (DBP) pêropîya 28 şaredarîyan ameyî kerdiş. Badê çend aşman qayûmî tayînê 96 şaredarîyanê DBPyî kerdî. Tayînkerdişê qayûmê Şaredarîya Bajarê Girdî ya Amedî ra dima, 1ê teşrîna peyêna 2016î de Hemserekê Şaredarîya Bajarê Girdî ya Amedî Gulten Kişanak û Firat Anliyî ke qayûm tayînê herinda înan bibi, ameyî tewqîfkerdiş. Tewqîfkerdişê hemşaerdaran ra dima Qeymeqamê Etîmesguta Anqara Cumalî Atîlla sey qayûm tayînê şaredarî bibî.
Tayînkerdişê qayûmî ra dima polîtîkayê xizmetî yê şaredarî bedilîyayî. Qayûm tebelayanê zafxizmetî ard war û herinda înan de xizmetê yewziwanî aliqna. Sewbîna nameyê parkan yê kurdî bedilna, kreşê ke perwerdeyîya kurdî dayêne û komeleyê cinîyan pada. Badê ke qayûm tayînê Şaredarîya Bajarê Girdî ya Amedî bî, şaredarî bedilîya qereqol. Dormeyê şaredarî bi barîyerê polîsan piştî û quleyê polîsan viraştî. Mîyanê şaredarî zî kêmê rewşa teber nîyo. Qato ke qayûm ci de maneno bi polîsanê sivîl û taybetan debîyo û heme qatê şaredarî de polîsî ameyî cakerdiş. Polîsî heme têgêrayîşê personelan taqîp kenî.
Şaredarî nîyo sey edlîye yo
Polîsê taybet ge-ge bi çekanê luledergan pêroyê awanî û odeyan gêrenî û xeylê tablo û vilikê ke ode û salonê awanî de yî bi mehneya ‘beno ke tehlukeyin bibo’ vejenî teber. Badê yew serrî qayûm barîyerê polîsan yê ke dormeyê awanî de bî wedarna û herinda înan de vildanê vilikan rona. Personelê şaredarî wexto ke kewenî awanî haletê X-Rayî ra derbaz benî. Personelî derbazbîyayîşê X.Rayî de timî kamîya xo nîşan danî û qayîş û saetê xo vejenî. Sewbîna personelî sere de nuqtaya teberê şaredarî ra yenî derbazkerdiş û dima ra mîyanê şaredarî de yenî cigêrayîş. Roja tayînkerdişê qayûmî ra heta nika her yew personelêk tewr kêmî hezar û 132 reyan ameyî kontrolkerdiş. Na rewşe seba hemwelatîyanê ke şonê şaredarî zî derbazdar a. Êdî hemwelatî nêzanê ke kam edlîye yo û kam şaredarî yo.
Hem namzedo hem zî şaredar
Qayûm tabelayê şaredarî ke ser de Amed nuştêne wedar na û tabela ra Amed ame vetiş. Herinda Amedî de ‘TC’ ame nuştiş. Serekê Pêroyî yê AKPyî Tayyîp Erdogan qayûm Atîlla seba weçînayîşê herêmî ke do 31ê adara 2019î de pê bêro kerd namzedê Şaredarîya Bajarê Girdî ya Amedî. Goreyê proseduran, ganî badê namzedî Atîlla îstifa bikerdêne, la hema zî wezîfe ser de yo.
AMED