Şeme hewteyo 700. de yenî têhet aqûbetê domananê xo pers kenî. Dayîke ra heta torinî, 3 neslî serra 95î ra nata Rasteyê Galatasarayî de aqûbetê domananê xo pers kenî. Dayîkî dîyar kenî ke wayîrvejîyayîşê Dayîkanê Şeme, wayîrvejîyayîşê wijdanê merdimîye yo û vanî ‘Yew vînîbîyaye daxî bimano, do têkoşînê ma dewam bikero’.
Dayîkê Şeme 27ê Gulana 1995î ra nata her hewte Rasteyê Galatasarayî de yenî têhet û no hewteyê 700. o ke yenî têhet. Dayîkî o wext ra nata her hewte aqûbetê vîndîbîyayeyanê xo pers kenî û wazenî ke wa kerdoxî bêrî mehkeme kerdene. Dayîkî heta nika her çiqas ke zext û tedayî bîyî zî fek waştişê xo ra veranêdayî.
Cinîya Fehmî Tosune Hanim Tosuna ke 19ê Teşrîna verêna 1995î ra nata mêrdeyê xo ra ti xebere nêgêna, qisey kerde. Tosune va ‘ma heta nika qet fek waştişê xo ra veranêdayo’ û wina domnaye: “No welat de qet edalet çinêbi. Heta ke na rewşe nêbedilîya, waştişê ma zî nêbedilîyeno. Ma senî ke roja sifteyîne vîndîbîyayeyê xo waşt, ma hewteyo 700. de zî eynî çî wazenî. Dewlete heta roja ewroyî babeta vîndîbîyayeyan de gamêk daxî nêeşto. Ma nêbî zî doman û torinê ma do hesab bipersî.”
Tosune dewamê qiseykerdişê xo de wina va: “Serranê 90î de derba ke mi werd ver, wijdanê mi rehet bîyêne. Çira? Çimkî ma dîyêne ke hûmara vîndîbîyayeyan kêmî bîyêne. Herçiqas ke heta nika gamêk nêerzîya zî, saya têkoşînê Dayîkê Şeme de fek vînîkerdişê merdiman ra veradayêne. Mi mêrdeyê xo vînî kerd û seba mi heme vînîbîyayeyî eynî yî. Ma wazenî wa arşîvanê nimiteyan bivejî raste. Yew vînîbîyaye daxî bimano, do têkoşîn dewam bikero.”
Wayîrvejîyayîşê wijdanê merdimîye yo
Kênaya Fehmî Tosune zî wina va: “Wa no sîstemo ke ceza nêdano û bêedaletîye xelq keno, bin ra bêro bedilnayene. Wa nê kerdişî bin nameyê vera merdimîye de sucî bêrî name kerdene. Wa aqûbetê domananê ma bêro aşkere kerdene. Bêedaletîye qebulkerdiş, qasê xelqkerdişê bêedaletîye şerm o. Cok ra qebul meke û bêveng memane. Ma do seba huqûq, edalet û rûmetê merdimîye veng bidî. Wayîrvejîyayîşê Dayîkê Şeme, wayîrvejîyayîşê wijdanê merdimîye yo.”
Heta dîyayîşê qatilan têkoşîn
Dayîka muxabîrê rojnameyê Ozgur Gundemî Ferhat Tepeyî, Zubeyde Tepeye zî va ‘ma 700 hewte yo ke vernîya Lîseya Galatasarayî de vînîbîyayeyanê xo gêrenî’ û wina dewam kerde: “Ma wazenî ke wa kerdoxî bêrî dîyayene û bêrî mehkeme kerdene. Ma hetê domananê xo de yî û destek danî domananê xo. Ma taqîbkarê doza înan î. Ma heta nika qet netîce nêgirewt. Qatilî hîna teber de yî. Ma do heta ke qatilî yenî dîyayene, têkoşînê xo bidomnî.”
Ma tena vînîbîyayeyanê xo wazenî
Cinîya Huseyîn Taşkayayo ke 6ê Kanûna 1993î de qezaya Sêwregi ya Riha de ame vînî kerdene, Sultan Taşkayaye zî qisey kerde. Taşkayaye daye zanayene ke dewlete zaf baş zana ke vînîbîyayeyê aye kura de yo û wina va: “Ma vînîbîyayeyanê xo wazenî. Ma wazenî wa herkes destek bido ma. Vînîbîyayeyê ma zaf î û wa herkes destek bido çalakîya ma. ”
MA / STENBOL