Qerwelyan de xoverdayişê şarî

Gureyînê viraştişê ocaxan rîwalê nêrazîbîyenê şarî  ameybî vindernayen. La badê wextekê reyna ra viraştişê ocaxan dewijan vist hereket. Cenî û camêrdê Qerwelyan şî cayê gureyînan û ver ocaxê kemeran de destpa nûmayişê protesto kerdî. Ser nayî ekîbê cendirmeyan ke şî cayê bîyayiş vernîya dewijan girotî.  

Destûr nêdanime

Dewijan day zonayene ke rîwalê teqînayişê dînamîtan keyeyê înan xesar vînenê, bostan û baxçeyê înan texrîb benê û aşkere kerdî ke iyê dê viraştişê ocaxê kemeran ra destûr nêdê.

Dewijan ra Îdrîs Çakabayî da zonayene ke rîwalê gûreyînanê ocaxê kemeran zey ronişteyê dewe ê mexdûr benê û hina dewam kerd: “Wexto ke teqînayen kenê dewijan rê anon kenê venê keyeyê xo veng bikerê. Semedo ke nê gureyînî nîrê ramiten ma serpirodayişê walitî kerd. Walî ma rê va ‘ez hetkarê şarî’ ya û gureyînan dana vindernayene. La badê wextekê reyna ra gureyînî amey destpa kerdene. Ma nîwazenê ke na ca de gureyînî bîrê ramitene.”

Çakabayî hayr ant rewşê verên yê dewî ser û niya va: “Verîya coy her serr ma 50 kamyonî sa vetî. La nika rîwalê ocaxê kemerî ma nêşkenê sayî biresnê. Sa yê ke resenê zî nînê werdiş. Sewze û mêwe (fêkî) zî eynî şiklî nînê werdiş. Zey dewe ma bin zilmê çend kesan de yê. Ma çoyî ra tewa nîwazeme. Tenya nêwazeme ke îta de gureyînî bîrê ramitene. Wexto ke ma vanê ‘zerarê ma bidê, vanê nê’.”

Goreyê fîrma rapor nuştî

Dewijan ra cenîyê bi nameyê Xeyrîye Çîçek û Mewlîde Çakmak zî waştî ke gureyînî bîrê vindernayene û hina vatî: “Tîya de ocaxanê kemerî de dînamîtî teqînenê. Eskerî ardê dekerdê dewî. Sermîyanê fîrma vanê ‘dew yê şima nê yê ma ya. Dewa ma zî ma ra girotî yê’.” 

Welatijan ra Nûrettîn Çakmakî zî da zonayen ke înan gerreyê xo resnayê walitî. Walitî înan rê vato ma ekîp rişnenê û cipersyayiş kenê û hina va: “La ekîbê ke walitî ruşnayî amey goreyê sermîyananê fîrma rapor girotî, nêkewtî dewe û peyser şî.”

Dewijan ra Ahmet Çagala zî îdia kerd ke sermîyananê fîrma ra jewî înan pê vatenanê ‘ma qoricîyan ruşnenê dewe, çend kesan kişenê, o wext dewijî cayê xo de nişenê ro’ tehdît kerdo. 

Çagala va ’na dew yê ma ya. Ma bikişê zî ma dewa xo terk nîkenê. Ahmet Çagala aşkere kerd ke sermîyanê fîrma xo pey eskeran de niminenê û qiseyê xo bi nê vatenan qedîna: “Fîrma eskeran ra paşt gêna, la tersê ma kesî ra çinîyo. 

Badê nêrazîbiyen û xoverdayişê Qerwelyanijan gurekarê fîrma cayê şantîye veng kerd û ser nayî welatijî zî ageyray dewa xo.