Heme cayanê Tirkîya ra 330 endamê Fedarasyonê Komelanê Ciwananê Sosyalîstan (SGDF), seba ke şerê Kobanê û paştî bidê Kobanêyijan, gedeyan rê mateyalanê kayê berê, yew parqê gedeyan virazê, yew kitabxane (pirtûkxane) saz bikê û fîdeyanê daristanê ronê, Pirsûs de kom bîyê. Seba ke meqsedê xo raya umûmîyê rê deklere bikî (bikerê), nê ciwanan Pirsûs de, bexçeyê Merkezê Kulturê Amara de yew beyanat da çapemenî. Hima no kombîyayîşê nê ciwanan  nêqedîyabi, mêyanê înan de, yew bomba teqya. Teqnayîşê na bomba de, 31 ciwan zeh bîyî. 20’ê înan  giran  104 hebî  ciwanî zî bîrîndar bîyî.  Nê ciwanan, seba birayeya kurdan û tirkan, seba aşitî û demokrasi, ganê xo feda kerdîy. Ez vera vîrameyanê înan de beşna xo tewînena.


Pekî no qetlîam çirê bîyo? 

Faîlê qetlîamê Pirsûsî, Şêx Abdurrahman Alagoz Semsûr ra yo. O û birayê ey Yunus Emre Alagoz, 14’ê Rezbera 2014’î de şîyê Sûrîya beşdarê (tewrê) DAIŞî bîyê. Abdurrahman Alagoz, endamê “Dokûmacîlar”î yo. Dokûmacîlar rêxistinêko gireydayeyê DAIŞî yo û hêrişê PYD keno. 60 endamê nê rêxistinî estê, zafê înan Semsûr ra yê. No rêxistin Til Abyad de hetê YPG ra yew darbeyo pîl werdo û komûtanê înan bîrîndar bîyo û dekewto destê YPG. Endamê nê rêxistinî, YPG ver remayê ameyê Tirkîya. Orhan Gonder o ke 5’ê Hezîrana 2015’î de Amed de, di hebî bombeyî teqnayî Semsûr ra yo û o zî endamê Dokûmacilarî yo. Aseno ke têkilîya Abdurrahman Alagozî  û Orhan Gonderî verî bîya.  

Çeteyê DAIŞî Orhan Gonder, 2’ê Hezîran de ameyo  Tirkîya. Amed de yew otele de mendo. 5’ê Hezîrane de mîtînga Amedî de, di hebî bombeyî dayî teqnayîş. Panc hebî merdimî qetl kerdê û 402 tenê zî bîrîndar kerdê. Pîyê nê merdimî vano ke, “Lajê mi 8 aşmî ra ver vînî (vîndî) bîyo. Mi ay wext muracaatê hêzê asayîşê kerdbi. No meracaatê mi sero polîsan mi ra vat ke ‘Lajê to şîyo Sûrîya, beşdarê (tewrê) DAIŞî bîyo’.” No merdim, Amed de yeno tewiştiş. Semedo ke leşkerîya xo biko, polisî ey îkaz kenê û dima serbest veradanê. Pîyê Abdurrahman Alagozî zî, di aşmî ra ver muracaatê hêzanê asayîşê keno. La yew netîce nêgirewto.  Nê merdimê DAIŞî, bêardim  tena xo ser, nişnê nê bombayan biteqnê. Aseno ke peydê nê çeteyan de sewbîna merdimî estê.

25’ê Hezîrana 2015’î de Çeteyanê DAIŞî, bi panc erebeyanê bombebarkerdeyan û bi 70 çeteyan hêrişê Kobanê kerd. Çeteyanê DAIŞî, Kobanê de pitik, gede, cinî, extîyar nêvat yewver 233 tenî qetil kerdê. Bi seyan Kobanêyijî bîrîndar kerdê. Goreyê vatişan,  no hêriş de zî zafê çeteyan, bi cebilxane  sîndorê Tirkîya ra vêrtê û hêrişê Kobanê kerdo.   

 

Xebera hêzanê dewletî esta

Ewta de ez wazena ke çend persan bipersa. Gelo nê çeteyê DAIŞî senê hewa, sîndorê Tirkîya ra vêrtê? Xebera hêzanê dewletî esta ke, hem Orhan Gonder û hem zî Abdurrahman Alagoz beşdarê DAIŞî bîyê. Orhan Gonder, Amed de yeno tewiştiş, çirê verradêno? Xebara heme hêzanê dewlete esta ke 5’ê hezîran de Meydanê Îstasyonî de mîtîngê HDP beno,  çirê no merdim nêgirêno taqîbat? Eke eynê ca de mîtîngê AKP bibîynî, nê çeteyî şîynanî na bomba biteqno? Endamê Fedarasyonê Komelanê Ciwananê Sosyalîstan (SGDF), 20’ê Temmûzeya 2015’î de wexto ke şonê Pirsûs, çend cayan de yenê sehnayîş. Heme cadeyanê Pirsûsî de qemereyî estê. Seba Kobanê ra Pirsûs de, hedî ra vêşêr polîsî estê. Abdurrahman Alagoz, senî hewa yeno Pirsûs û bexçeyê Merkezê Kulturî ya Amara de û mîyanê ciwanan de bomba teqneno? 

Merdimo ke Edene de û Mersîn de bombeyî vistê bîneyanê HDP ser, birayê ey DAIŞî mîyan de ca girewto. No merdim zaf ray şîyo Sûrîya û ameyo Tirkîya. Teqnayîşê nê bombayan dima dîyar bi ke, sewbîna bombeyî zî yenê teqnayîş. Vanê; “Şewa tarî şan ra dîyar a” Çi heyf ke Îstîxbaratê Tirkîya û hêzanê asayîşî tedbîr nêgirewto. Tersê ey aseno ke, dewlete mîyan de, qorî merdimî, nê qatîlan rê ardim kenê. Mesela 5’ê hezîranî de, Amed de, mîtînga HDPî de, cadeyan sero sehnayîş bi. La kuçeyî  ke vejîyaynê cadeyê Ofîsî ser, sehnayîş çin bi. Şeyîş ameyîş serbest bi.  Kê ke Ofîs ra verbê îstasyone şonê, kişta raşt de, beyntarê bînaya tewr peynî û yurdî de, barîqatê polîsan erd de vistebî. Ewta de ti polîs çin bi. Tu sehnayîş çin bi. Verbê Rezan şeyîş-ameyîş serbest bi. Wexto ke mi na manzara dîy, ez zaf xemgîn bîya, moralê mi herimîya. Semedo ke beyntarê nê bînayan de zaf merdimî çinbî, erd mi ra asaynî, raşta ey (jey) ez dormareyê xo bombayan geyraya. Mi zerreyê xo de vat ke; nika se yew çeteyê DAIŞî bêro, yew bomba fîyna şarî ser, ko tam qetlîam bivirazîyo. Yew vatiş esto vanê ke; “Çîyo ke ame vîrî mi, ame sereyê mi ser.” Nêm saetî dima 5 metreyî mi ra dûrî bombaya yewine,  4-5 deqey dima bombaya dîyine teqay. Ger ke ez se hemwelatî DAIŞî taqîb bika, zaf-tay ez texmîn kena ke DAIŞ sekeno. Çi heyf ke Dewleta Tirkîya, kurdan nêpawena. Semedo ke amînê na dewlete de nîjadperestey esta, na dewlete kurdan ra hes nêkena. Heqanî ke xo rê se yew heqo normal veynenê, kurdan rê nê heqan rewa nêveynenê. Goreyê înan tewr kurdo baş, kurdo merde yo. Hetan no zîhnîyet nêbedilîyo, meseleya kurdan, meseleya demokrasî tikê zor çareser bena!


No vatişê ma raşt vejîya

Ma nê rojan de zaf ye demo krîtîk ra vêrenê. Yew het ra hima veşê 31 ciwanan dewam keno. Yew het ra Tirkîya de û dinya de no qetlîam bi meşan û tewir bi tewir çalekîyan şermizar beno. Yewna het ra Dewlete rayna dest bi operasyonanê sîvîlan kerdo. Yewna het ra rayna koyî bi teyeranê cengî bombardiman benê. Prosesê çareserî dekewto taloke. Nê rojan de, beyntarê Dewleta Tirkîya û DAIŞî de zî şer dest pêkerdo. Ma zaf ray vat ke DAIŞ, kam roj bibo, vera çekan tadano Dewleta Tirkîya zî. No vatişê ma raşt vejîya. Çunki no rêxistin heme kesan û dewletan ra bîat wazeno. Bê xo, mensûbanê heme feresetan, mezheban û dînan; kafîr, murted, rafîzî veyneno.

Hewce keno ke, dewleta Tirkîya zerreyê keyê xo de meseleyanê xo bi dîyalog hal biko. Des madeyan ser o yew mutabaqat virazîyabi. Ma wazenê ke Prosesê Çareserî berhewa nêbo. Şaranê Tirkîya ceng ra zaf anta. Hewce keno ke, hem Dewleta Tirkîya û hem zî terafî kurdan bi aqilûselîm têbigeyrê û heme meseleyanê Tirkîya bi dîyalogan çareser bikî (bikerê). Şarê Tirkîya, se ra neway, hinê nêwazenê ke no walat de gonî bilabo.  


MAMOSTE SILÊMAN