Şaredariya Licê ke şewa verî hetê polîsan girotîya bin eblûqa, qeymeqamê qeza zey qeyûm tayînê şaredarî kerdî.
Polîsê ke şewa verî ra eştî ser Şaredariya Licê, heta vizêr sodir cigeyrayiş viraştî. Sereştişê polîsan seatanê ke kes mîyan de çin bi de virazîya. Polîsan çormeyê bana şaredarî û yê qeymeqamtî bi barîyeran girewtî.
Gurekarî nêgirewtî şaredarî
Gurekarê şaredarî ke vizêr seatanê sodir de şî şaredarî hetê polîsan bi vatena ‘zerre de cigerayiş esto’ vindernîyay û polîsan destûr nêda ke bikewê zerre. Peycoy zî polîsan gurekaran rê vato “bêrê kêberê odeyanê xo akerê, dima ra şirê keyeyanê xo, tiya de mevinderê.”
Wextekê dima ra armancê sereştiş û cigerayişan aşkere bi. Qeymeqamê Licê Sînan Başak zey qeyûm tayînê şaredarî ame kerdiş. Dima ra qerarê walîtiya Amedî hetê Wezîrê Karê Zerrî ra ame testîqkerdiş û hurendîya Hemşaredaranê DBP Rezan Zogûrlû û Kadrî Bayram de qeyûm Başak ame tayînkerdiş.
AMED