Qeyûmî ra pîya eynî roj hemşaredara DBP ê Cirîz Leyla Îmret û xele îdarekarê DBP û HDP gerîyayî bî binçim. Leyla Îmret 4 rojî binçim de girotiş ra dima serbest veradîya.
Îmret vist vîrî ke vijnayîş (weçînayiş) de ma sera 83 rey guretî û no miyejneno ra ke ma îradeyê şarî temsîl kene. Îmret aşkere kerd ke a wexte qedexeyê Cizîr de gure ra finîyaya dûrî. Leyla Îmret eleqa ûnt dişmeniyê AKP ê verra şarê Kurd ser û qalkerdişê xo ûna ramit: “AKP şaredarîyê ke pê vijnayîşa rayeyo demokratîk ra nişkîya bigîre, êr pêqeyûmî xesp kena. Çi ke şaredarîyê ma pê sûcdar benî pêroyê îftîrayî. Ma raporê xo ê teftîşî danî sawcîyene. Belgeyan de zî eyseno ke qeyûmo ke erzîyo şaredariyê ma bêhiqûqî yo.
Biyayîşê êr serranê 90. viyertî
Leyla Îmret arde zûne ke ê hetûn êr têna semedê holê şarî ya guriyay û vat: “Şaredariyanê ma re qayûm û polîtîkayê qirkerdena siyasî peroyê semedê îradeyê ma şiknayişo. Dewlet pede-pede ped şina. Biyayîşê êr serranê 90. viyertî.” Leyla Îmret da zûnayene ke ê rixmê pêroyê keratiyê cayê şarî de ca gene û gurenayîşê xo re dewam kene. Îmret vat gerek dewleta tirk hinî fûmbikero ke pê herîş tiway dest nêfînena, verra kurdan herb caver û semedê holê pêroyê şaran yew gûma hol berz.
Şar wahar îradeyê xo vecîyeno
Amed de welatijî her şo pê çalakiyê vêngiya paşt danî vîjnayenanê xo. Welatijî anî zûne ke ê qeyûmî nêsarisnenî û çalakiyan ê qerarê qayûmî pêd qeledene.
Per bîn ra Kongreya Jinen Azad ê Amed zî pê yew eşkerakerdişa destseranayîşê şaredariyan şermezar kerd. Eşkerakerdiş de vaciya ke îdarekarê ke şarî vîjnayî têna şar eşkeno pêd bianco. Ceniyan arde zûne ke înan hetûn êr verê zilm de milê xo çot nêkerd êra tepiya zî çot nêkenî. Hûnca Estanbûl de zî ceniyî vera gaspkerdişê belediyan veciyay. Ceniyan arde zûne ke no yew darbeyo sivîlo. Ceniyan ra Fîlîz Karakuş vat; hukumetê AKP pê vatişê demokrasî şar xapîna û darbe viraşt. Karakuş vist vîre ke pê paşte şaredariyan de emeg û îradeyê bi mîlyonan esto û vat: „Nê şaredariyan de sîstemê hemserokiye esta. Rayverê şaredariyan eynî waxte de ceniyî. Coka eynî waxte de pê no darbiya dest niya îradeyê ceniyan ser.“
Fadîmê Çelebî zî semedê paştdayenê veng da şaredariyanê Tirkiye û vat: „Kurdistan nê biyayîşê faşîstî hinda sînor nêsarisnenî. Semedê vernî înan gurtişa gerek şaredariyê bîn vera qayûm bivecî. „Ozgul Sakî zî eleqa ûnt şaredariyanê DBP de têdustiye ser û vat: „Roja vêrîn ra hukumet verva sîstemê hemserokiyê ho herb do. Gorê înan cenî têna semedê bindestiya esta. La ê seken wa bikerî, tekoşîn dên milê mayo.“
DJE ra nêrazîbîyen
Xespkerdişê 24 şaredarîyê DBP, rastê nêrazîbiyayinê sefîrê Emerîka ê Enqerî Jonh Baas zî ameybî. John Baas tayinkerdişê qeyûman rexne kerdbi û omid kerdbi ke rojê ravey, cayê ke qeyûmî tayîn bîyê de weçînayişî virazîyê. Rayverînê tirk zî, enê vatenê sefîrê Emerîkî zey mudaxaleyê karê zereyê yê xo hesibnaybî û rexne kerdîbî.
Vatoxê Wezîrînê Karê Tever ê Dewletanê Jûbiyayinê Emerîka Mark Toner cewab da persanê derheqê vatenanê rayveranê tirk ê vera John Baas'î. Tonerî va ‘sefîrê ma ê Tirkîye, wayirê destegê bêkemiyin ê serokê ma û wezîrê karê tever ê ma yo.’ Tonerî persa zey ‘Emerîka ser protestoyanê rayveranê tirk se vana’ zî wina cewab kerd: “Ma desteg danê vatenanê sefîrê xo. Ma Tirkîye de wayirê hetkarînê girdê. Çiyê winayin heq dano ma ke, ma derheqê heqê merdiman û rewşê demokrasîya Tirkîye de nêrazîbîyayenanê xo biyarê ziwan.” Toner'î persa zey ‘goreyê şima damûsnayinê sefîrê şima, fikrê şexsî bi’ ser zî wina vat: “Çi wext cayê sefîrê ma qisey bikero, o ser nameyê Dewletanê Jûbiyayinê Emerîka sero qisey keno.
NAVENDÊ XEBERAN