Bircê Zembîlfroşî ke Sûrê Farqînî mîyan de yo, bi hezaran serrî yo ke payan ser de yo. Dergîya bircê tarîxî 25 metre ya û dinya de tena o bi sîstemê degirotişî virazîyayo. Nizdîyê Bircê Zembîlfroşî de rayîrêk yeno viraştiş û bi no hawa birc yeno texrîbkerdiş.
Tarîxê viraştişê bircî goreyê texmînan wextê Qralê Tîgrano Pîlî de virazîyayo. Qayûmo ke tayînê Şaredarîya Farqînî bî dest bi xebatê viraştişê rayîrî kerd û kerrayê tarîxî bi makîneyê karî ameyî talankerdiş. Xebatan de tena cayê tarîxî nê, dikan û keyeyê hemwelatîyan zî zirar vînenê. Farqînijan vera nêyî de reaksîyon nawitî.
Şaredarî bîya sey qereqolî
Hemwelatîyan qiseykerdişê xo de wina vatî: “Şaredarî bîya sey qereqolî. Tarîx û erjê ma yenê rijnayîş. Eke şaredarî destê DBPyî de bibîyêne, ma do asanî bişîyêne ewja. Destê ma ra çîyêk nîno. Rayîr vera qereqolî de yeno viraştiş. Keye û dikanê ma zirar vînenî. Ma veng danî her kesî ke wa vera nêyî de reaksîyon binawnî.”
ŞÛJIN/AMED