Hukmatê AKPyî yo ke nêşîna bi rayîrê weçînayîşan Şaredarîya qezaya Bêgirî ya Wanî bigiro, bi tayînkerdişê qeyûmî dest rona şaredarîye ser de.
Seba ke herême de dezgehê weşîye tay û pereyin bî, Şaredarîya Bêgirî merkezê qeza de klînîkê weşîye akerde. Hemserekê Şaredarîye Dr. Mehmet Alî Tunç bi xo zî tîya de nêweşan muayene kerdbî. Nê klînîkî de heme xizmetê weşîye bêpere ameyenê dayîş. Rojêk de nizdîyê 80 kesan rê xizmetê weşîye ameyêne dayîş. Badê ke Safîre Guneşe bîye hemsereke ra dima giranî dîya xebatanê cinîyan. Merkezê Cinîyan yê Sara ame akerdiş. Tîya de derheqê welidîyayîş, pakî, ewnîyayîşê domanan û weşîye de semînerî ameyî dayîş. Cayo ke tede xaliyî ameyênê şitiş de bi temamî cinîyî xebetîyayênê. Kamcîn cinîye musaîd bibîyêne û lazimîya aye bi pere bibîyêne, aye xebetîyayêne.
Kreş û keyeyê meymanan
Qeza de vera asîmîlasyonî de kreşo sifteyîn yê kurdî ame akerdiş. Kreşo ke 3 mamostayî tede wezîfedar bîyî, tîya de cayê kayî, perwerde û rehabîlîtasyonî estbî û 35 wendekarî perwerde dîyêne. Heto bîn ra seba cinîyê ke dewan ra ameyênê merkezê qeza, cayê meymanan amebî akerdiş. Cinîyê ke seba karê xo dewan ra ameyênê merkezê qeza, wexto ke karê înan qedîyayênê, cayê meymanan de mendênê. Tîya de cinîyan rê werd zî ameyênê dayîş. Şaredarîye heto bîn ra dewanê Koşk û Babacanî de keyeyê şarî akerde.Şaredarîye seba welatîyê ke nêşînayêne nan bîşêrî keyeyê xo, firina nanî akerdbî û na firine de her roje 3 hezar û 500 nanî ameyêne vetiş. Nan teber de 90 kuruş bîye, la firine de 50 kuruş ra ameyêne rotiş.
Qeyûmî hemînan da vindarnayîş
Qeymeqamê qezaya Bêgirî ya Wanî Mehmet Fatîh Çelîkel sey qeyûm tayînê şaredarîye bî. Şaredarîya ke verê cû şar bi hawayo asan kewtênê mîyan açarîyaye qereqol. Qeyûmî heme xebatan vindarna û zafaneyê dezgehan pada. Reyna qeyûmî zafaneyê xebatkaran karî ra vet.
ŞÛJIN/WAN