Miqatekerdişê boranan de emir çin o û domanan ra heta ciwanan û extîyaran, her emir de kesî boranan miqate kenî. Miqatekerdişê boranan eşqêk o û no eşq bitaybetî ciwananê Amedî de vejîyeno aver.
Qezaya Sûrî ya Amedî ke se ra 80ê ci ameyo rijnayene de verê cû miqatekerdişê boranan de zaf vejîyayêne aver. Kesê ke înan ra ‘Teyrbaz’ ameyêne vatene û boranan miqate kerdêne, heta nika înan ser o xeylê hîkaye, belgefîlm, fîlm û sewbîna ameyî nuştene û an zî antene.
Kesê ke teyrbazîye kenî zaf muhîmî danî boranan û çîyê ke seba xo nêkenî, seba borananê xo kenî. Eke vatiş ca de bo; nêwenî danî werdene, xo rê nêkenî labelê borananê xo rê kenî. Fotograf de zî aseno ke no teyrbaz seba borananê xo 2 pînî viraştî û mîyanê pînî zî bi sepetan xemilnayî. Asino ke bitaybetî ameyo viraştene herinda berê pînî de panîyayo û pîrîketan reyde zî dengeyê pînî ameyo viraştene.
Boranan mîyan de tewir bi tewir borani estî. Borana ke bi saetan firena ra bigîre heta ya ke dormeyê qirika ci bi perran padaye ya, reyna ya ke lingê aye bi perran ra nêasenî ra bigîre heta yê ke rengûreng a, xeylê tewirî pîn de estî. Her tewire bi nameyêko cîya yeno namekerdene.
Seba înan eşqê boranan heme çî ra ver yeno
Ge-ge merdim mîyanê qezaya Sûrî de raştê kesê ke banê înan ameyo rijnayene, yeno. Nê kesan verê cû borani miqate kerdî û nika zî bedenanê Amedî ser ro gêrenî û banê ke ser o boranî estî ra ewnîyenî û hesretîya xo ya boranan derbaz kenî. Firayîşê her borane, zerrîya înan de heyecanêko gird virazeno. Seba înan eşqê boranan heme çîyî ra ver yeno.
AMED