Nika Kobanê de şerê ke bê ehlaq, şerê ke bê huquq, şerê ke bê vîcdan est o. Çete yê wehşîyan û dewletê ke piştgirî-paşt danê no wehşîyan hes kenê Kobanê bikewo.
Çike Kobanê de rûhê azadî esto, çike Kobanê de hêvî yê kurdan esto, çike Kobanê de biratî yê şaran esto, çike Kobanê de kurdan rê û şarê Kobanê bînan rê heq, huquq, edalet, demokrasî esto, çike Kobanê de pratîkê sîyasetê kurdan esto, çike Kobanê de pratîkê felsefe yê serokê kurdan esto, çike adîrê ge Kobanê de roşin da no do çar perçe yê Kurdîstanî de roşnayî yê ke gird virazno.
Dewletê ke piştgirî danê no wehşîyan no xûsûs-babed ra zaf tersenê. Gore yê sîyasetê no dewletan ganî kurdî dinya de rehet nivînê, ganî kurdî sere yê xo berz nêkerê, ganî kurdî mîyanê tarîtî de bimanê û kurdan rê xeyalê azad bîyayîşî çinêbo. La sîyasetê no dewletan mîyanê kuçanê Kobanî de, mîyanê qelbê şervanê YPG û YPJ yî yan de, mîyanê rûhê şehîdanê çar perçeyî de, mîyanê hûyayîşê domanan de, mîyanê duayanê kalik û pîrikan de do betal bibo.
Do siyasetê înan Kobanê de perçe percê bibo.
Şarê Kobanê bi canê xo bi ruhê xo bi şeklê ke fedaî Kobanê de şer kenê. Semedê welatê xo, semedê azadî yê xo, semedê axa xo, şarê xo, malbata xo, domananê xo, namûsê xo, şerefê xo şer kenê. Çete yê wehşîyan bi tanqan, bi topan, bi çekê giranan û bi hezaran wehşîyanê xo ra pîya erîşê Kobanê kenê. Kobanê bi zaf îmkananê taynan xo, verra no erîşê wehşîyan ra xo ver dano. Kobanê hemverê no çeteyê wehşîyan de tenya yo. Ay ke vanê “Kurdî birayê ma yê” , ay ke vanê “Ma misilmanê yê” , ay ke vanê “ma dinya de edalet kenê vila” û ay ke vanê “ma vengê şarê bindestenê” hemverê no zulmî de paşt nêdanê kurdan.
Qijîya Kobanê rê goşanê xo gênê. La dîroka kurdan, kam nê rojanê tengasîyan de semedê kurdan sekerd do binivîso. Ez bawer kena kurdî nê rojanê tengî dê xo vîr ra nêkerê.
Ay ke xo ra vanê ma însanê, ay ke xo ra vanê ma kurdê ganî verê şarê Kobanê de bibê. Ganî ewro hîrî perçe-lete yê Kurdîstanî de semedê Kobanê sere wedarê.
Amed de, Dêrsim de, Hewler de, Silêmanî de, Mahabad de, Kirmanşah de kurdî semedê şarê Rojawan bi canê xo, bi ruhê xo hetkarî bikerê. Çike Kobanê biko, bi rastî Amed kono, Hewler kono, Mahabad kono. Çar perçe Kurdîstan kono. Nika Kobanê turnosolê însanîyetî yo. Kam verê kurdan de yo, kam hes keno kurdî qir bibe aseno.
Ay ke hes kenê Kobanê biko şey sîsarikî hîvî yê kewtişê Kobanê yê. Destanê xo fereqnenê û qijîya Kobanê rê verpers nêdanê. Ez bawer kena do Kobanê bibo mezelê no çeteyê wehşîyan û dewletê ke piştgirî danê no wehşîyan.
Şima goşanê xo bigîrê, qijîya Kobanê do şima bikero kerr.
SERDAR HEZANIJ