Na sene dînya ya? No sene sîyaset o? Na sene bêvengî ya? Ey cematê kurdî! Jû malbate teyna seweta zonê mayan de perverde 11 serrî yo xoverdayîs dera. Malbata Hidir Ercanî 2010 ra na het zî 6 domonanê xo mektebê tirk nêrusnena. Malbata Ercan venga saziyanê kurdan dana û vana: “Bêrê Mektebê Şehît Mazlum Dogan rakerîme.” Hama 11 serrî yo kes na qîrayîsê malbata Ercan nêhesneno. Saziyê kurdan biyê gosegiran! Çi xerîb!

Malbata Ercan ebi xo Mêrdîn ra ya. 6 domonê xo estê: Mazlum Dogan, Ocalan, Mahsum Korkmaz, Bahoz Erdal, Şoreşger Berîtan û Dersîm. Mordemî ke nî nameyan de niyada û kerenya saziyanê kurdan de, vano sazî û dezgeyê kurdî çînê, ya zî teyna siyaset virazenê û nêzonenê seweta çinayî? Nî domonî çe de zonê xo musenê, hama teslîmê mektebanê asîmîlasyonî nêbenê. Bravo!!!
Malbata Ercan 11 serrî yo bi slogan “asîmîlasyonî rê nê” xoverdayîsê xo devam kena. Zaf kurdî na slogan erzenê, la raştiye de kes mektebanê asîmîlasyonî ra nêtexelîno.
Malbata Ercan 2002 de seweta zonê mayan de perverde muracatê valiyê Mêrdîn kena. Rîwalê na muracatî ra Hidir Ercan 3 asmî ceza ceno û hepisxane de maneno. Polîsê dewleta tirkî mezal na malbatae nêdanê, tim tim tehdît kenê. Peyniya zor û zorvajiya teqetanê dewleta gonewere de, malbata Ercanî mecburî manena, bar kena sona Estemol.
2010 de malbata Ercanî dest kena ci, domonanê xo mektebê tirkî nêrusnena. Naye ser memurê wezaretê perverdê tirkî yenê çê malbate tehdît kenê û vanê: “Eke domonanê xo mekteb nêrusnena, domonan to dest ra ceme.” Malbate onca zî teslîmê tehdîtanê memuranê dewlete nêbena. Malbate na raye zî estemol de ca bi ca fetelîna, eskerakerdîsan virazena û çalakiyê xo ramena.
Malbata Ercan 28ê sîbate 2012 de serokwezîrê tirkî Recep Tayyîp Erdogan rê jû mektube nusnena, tey zonê mayan de perverde, Kurdistan rê statu û Ocalan rê serbestiye wazena. Serokwezîrê tirkî cevabê mektube nêdano. Verva naye malbate Anqara de mehkeme kena ra. La, mehkemê tirkî dawa red keno û sero zî qerar dano û vano malbate gune 600 lîra masrafê vekaletiye bido.
Rozanê peyenan de malbate Estemol de verê Lîsa Galatasaray de onca çalakî de biye. Na çalakî de malbate onca veng da û vat: “Bêrê Mektebê Şehît Mazlum Doga rakerîme. Zon les a, lesa xorê wayîr vejiye.” Domonanê malbata Ercan zî na slogan est: “Bê zon weşiye nêbena!” Malbata Ercanî vana: “ Bêrê hata ke zonê ma Kurdîstan de fermî nêbî, Rayverê Qomê Kurdî serbest nêbî, pêro mehkumê siyasî ranêverdiyayî, domonanê xo mektebanê asîmîlasyonî meruşnîme!” Hama siyasetê ma piloşiyo tîrkî ro.