SEMRA TURAN / MA / DÊRSIM
Netîceyê hewa û bejayî ra bombekerdişî de cografyaya Dêrsimî veşena. Hêzê dewlete mudaxaleyê şewatî nêkenî û destûr nêdanî kesê zerrîwaştoxî zî şewatan hewna bikerî. Cok ra şewatî her ke şono hîra benî. Netîceyê şewatan de teyr û tûr mirenî.
Babete ser o Endamê Meclîsê Partîye yê HDPyî Cevdet Konakî va ‘bi serran o cografyaya Dêrsimî yena çinî kerdene’ û wina domna: “Şewatî bi hawayo plankerde yenî vetene. Tena daristanî nê, gandarî zî zirar vînenî. Ganî dezgeyê berpirsîyarî hesas bibî.”
Kesê ke hewl danî şewatî bimirênî ra yew zî Serdar Duman o. Dumanî va ‘her roje bi hezaran dolimî daristanî veşenî’ û wina dewam kerd: “Cayê ke şewatî yenî vetene, qedexe yî û destûr nêdîyeno ma şêrî hewna bikerî. Labelê ma ti kesî ra destûr nêgênî û ma hewl danî şewatan hewna bikerî. Ma ti dezge temsîl nêkenî. Tîya de tena darî nêveşenî, heş, awrêş, simore û sewbîna daristanan teriknenî. Eke hewa ra mudaxale bikerî, saetêk de yeno hewna kerdene. Dêrsim cenet o, wazenî çinî bikerî.”
Bi hawayo qestî veşnenî
Huseyîn Zeytînî zî wina va: “Nê darisatanan de merdimî nêcuyenî û helîkopterî yenî daristanan veşnenî. Çi eleqeyê xo terorî reyde esto? Bi hawayo qestî daristananê ma veşnenî. Wexto ke rojawan de şewat vejîyeno, seferberîye îlan kenî. Eke ma nika teyarayêk biwazî, ê helîkotera ke şewat bivejo erşawenî. Cok ra ma dewlete ra hetkarîye nêwazenî.”