28 gulane 1980 de goneweran, taxa alewîyan Mîlonu de; “Gonî rê gon hêfê xo cême”, “Gonîya ma berr bibo kî(zî) zefer î yê îslam o” deyin ebe(bi) sloganan galimê alewîyan kerdo. Dest pêkerdîşê Qirrimê Çorimî, na sevev(semed) ra 28ê gulane saye bena. Tirkîya hata nika jê(sey) ê bînan, têrî amayîşê Qirrimê Çorimî ser kî jû(yew) game bîla nêeşta. Ewro bîyo eskera kî amadeyê nê qirriman kî jê qirrimê Mereşî zaf rew ra virajîyê.
Çorim de qirrimê pîlî, 1yê temmuze ra dima(badê) virajîyê. Gonewerî a roze ebe sloganê ; “Ya tam bêveng verdame ya(yan) kî gon dame ra viraznayene” vejîyê meydan. Na qirrim ra raver(aver) pêro telefonî birrîye. Walîyê Çorimî, qedexê tever vecîyayîş no ro, hema hen aseno ke teyna alewîyî kute(kewte) çêyanê xo. Çike xeylê alewî, çêyê xo de ya kî dukanê xo de vêsê. Ortê nê qirriman de qirrimo pîl 4 temmuze de virajîyo. Azperestan(nîjadperestan), nimazê roja êne ra dima, jû jûr axme kerdo. Na jûr a gore; alewîyan taxa Mîlonu de jû camîyê rê bomba eşta. Çitur ke bîyo, walîyê Çorimî kî o siped qedexê tever vecîyayîşî do we! Na sorê (plan) ser o kam ke camîye ra vejîyo çike gureto destê xo galimê taxa alewîyan kerdo. TRT na hal ser o, pêsor pêsor televîzyon de no jûr xebere deyin vila kerdo. No xebere de; “Çorim de Camîya Alaaddîn rê bomba erjîya”, vato ke qirrim de bara xo jêdna.
Oncîya çitur ke bîyo! na qirrim ra raver, Sermîyanê Asayîşê Çorimî wazîfe ra cêrîno û hurendîya ey rê gonowero namdarê Dêrsimî Nail BOZKURT tayîn bîyo. Neyra kî nêmendo, qirrim ra raver walî û sermîyanê perwerdeyî kî wazîfe ra cêrînê û hurendîya nînan de kî gonqeretê MHPyî wazîfe cênê.
Qirrimê Çorimi, 28 gulane 1980 ra hata 5 temmuze 1980’îne verê çimanê dewlete de, deva-deve jû nêm asme(mange) dewam kerdê. Nê qirriman de reqemê dewlete ra 57 alewî kişîyê û 300 kesî ra jêde yî kî bîyê dirvetin. 300 çêyî ra jêde çêyî kî vêsîyê ya kî rijîyê. Çi hêfo ke xortî, domanî, çênekî û kokimî jê Mereş, oncîya ya vêsnê, ya xinc bîyê, ya kî ebe şîyazet kişîyê. Alewîyan ra î yê ke peyde mendê, înan kî çêyê xo bar kerdo şîyê zobîna(sewbîna) sukeyan(şarîstan).
Çi hêfo ke derbedarê 12 êlule, na qirrim kerdo manê û dirveta ma ser ra oncîya do ma rê. Ewro na qirrim ser ra 36 serrî vêrdê, hema hona(hîna) na girê(mesele) ser o têrî amayîş nêvirajîyo. Na hal ser o, î yê ke peyde mendê ewro nîya vanê; “Dirveta ma kul gîreda, hema kes melhem panêsoyna. Jê qirrimanê verênan, nê qirriman ser o kî şîîrî nusnayî, kilamî virajîyayî, fîlmî ontîyayî… hema nê derman nêbî. Hata ke dewlete na girê ser o têrî amayîş rê mecbur nêmende, no kul kî wes nêbeno.”