Dewleta tirk hina dewleta ke, wexto ke qale kurdan beno, lerzena, bena gej û har, hişê xo vînî kena, Ar û namûsê ayê nêmaneno. Dewleta tirk hina dewleta ke, wexto ke qalê kurdan beno, bena dişmene bêmîsal, tersena ke ser şarê kurdî fikir bikero, seba (qey) ke kurdî nêresê heqê xo, pereyan rişnena, ar û namûsê xo roşena.
Seba nayî xo resnena mişawîrê Trumpî yê bi nameyê Flynn, 500 hezar pereya dana eyê qey ke bianco hetê xo. Xora Erdogan nê hewteyî eşkera va ke, seba ke YPG nêkewo Reqayî çi tawîz bibo ma da Amerîka, reyna Amerîka sey ma nêkerd.
Tîya de zelal vejîyeno werte ke, dewleta tirk pêronê kar û xebatê xo ser dişmenî û neyartîya Kurd û Kurdistanî ramena. Bi taybetî Erdogan-AKP û dewleta tirk zanî, eke şarê Kurd Kurdistana azad rono, do şarê Ereb, Çerkez, Lazî zî cesaret bigîrê û vajê ma zî heqê xo wazenî. Wexto ke nê şarî heqê xo biwazenê, dewleta tirk heqê înan qebûl nêkero, eyê zî têkoşîn bikerê. Qey nayî Erdogan-AKP û dewleta tirk zaf tersenê. Qey nayî vanî, Rojawayê Kurdistan seba ma meseleya mendiş û çinbîyayîşî ya. Xora yeno zanayîş, Erdogan-AKP û dewleta tirk seba ke şarê kurd, Rojawayê Kurdistanî de, Kurdistanêke azad nêrono, çi destê ci ra ame kerd.
Destek da DAÎŞî, El Nusra û Ahrar-î Şamî. Raste rast tayî rêxistinê çete sey Sûltan Mûrad û Abdulhemîd înan awankerdî. Pê (bi) înan netîce negirewt. Dima ra artêşa tirk bi xo şî kewt Cerablûs, Qabasîn û Babî. Hina kerd ke, Rojawayê Kurdistan nêbibo yew lete. Efrîn û Minbic pabestê nêbo. La Erdogan-AKP û dewleta tirk se kerd, sernêkewt. Tîya ra pê zî se bikerênê, reyna sernêkewnî. Erdogan biteqo, xo nata û weta zî bido, nêeşkeno serbikewro.
Erdogan kewto hewnaê Neo-Osmancîtî. Hema hewnê Neo-Osmancîtî ra ayî nêbîyo. Ma kamcî çaxî de ciwîyenî. Hayê eyê pê nê çaxî ra zî çin o. Vano qey ez dinya seserre tepîya bena. Wa dinya seserre tepîya zî bibo. La wa vîrnêkero, şarê kurd, şarê seserre yê verê cû nîyo. Şert û mercê Kurdistanî zî sey seserre verê cû nîyê. Rêxistinê kurd zî hina nîyê. Hele PKK sey adirîya. Sey adire azadîya. Şina ça germayê azadî bena. Kam tayî fikre PKK gêno, tamê azadî gêno. Rojawayê Kurdistanî zî hinayo. Rayverê Şarê Kurd Abdullah Ocalan, Rojawa de tam vîst serrî mend. Şarê Kurd kewt bin tesîrê Ocalanî. Ser nayî tesîrî rêxistinî awanbîyê. Keyna û lajê kurd bîyê têkoşer. Game bi game Rojawayê Kurdistanî xelesna. Nika zî Bakurê Surîyê dagîrkerîya çeteyanê DAÎŞ û dewleta tirk ra xelesnenê. Reqa xelesnenê. Erdogan sebikero, do Reqa bixelesyo.