QSDyî îzehetê xo de vato ‘Ma roja destpêke ra heta nika cayê ke ma DAIŞî ra xelisnayî, ê cayan de ma goreyê qanûnê şer, heqê merdiman û qanûnê mîyanewteweyî hereket kerdo’ û îzehet de wina ameyo vatiş: “Eynî wextî de ma mal û milkê şarê xo pawit û ma heqê înan zî pawit. Seba ke ma bawer kenî ke ma eşkenî ewleyî û seyyewbînanî awan bikerî. Ma bi heme reng û bawerîyê xo wehşet û terorê DAIŞî ra xelisnenî û ma hêzê xo nêyî ra gênî.”
QSDyî dewamê îzehetê xo de vato bale anto ser esasê ke ê sîstemê xo ser de awan kerdî û îzehet wina qedîyeno: “Ma veng danî heme hêzê muxalîfî yê biçek ke wa goreyê heme ray û raybazê ke QSDyî seba pawitişê sîvîlan esas girewto hereket bikerî. Nê ray û raybazî zî nê yî:
Ray û raybazî QSD
* Asankerdiş û resnayîşê hetkarîyê merdimîye ya seba heme herêman. Eynî wextî de rêzgirewtiş û pawitişê xebatkarê ke karê resnayîşê hetkarîya merdimîye û weşîye kenî. Seba resnayîşê xizmetê esasî koçber û bextwaştoxan rê destûr bêro dayîş.
* Rêzgirewtiş û pawitişê mekteb, nêweşxane, merkezê dînî, cayê kulturî û heme dezgeyê sîvîlî.
* Wexto ke heyatê sîvîlan mîyanê telûke de bo, ganî seba vîyartişê cayê biewle rê destûr bêro dayîş. La bi zorî koçkerdiş qedexe yo.
* Qedexekerdişê zextê cinsî û seba kare leşkerî qedexekerdişê şuxilnayîşê domanan.
* Pawitişê şexsê ke heyatê înan tewr zêde mîyanê telûke de yo (Doman, cinî û kesê extîyar û astengdar’
* Ganî çekê qedexeyî nêrî xebetnayîş û reyna ganî çekî bi hawayo vila nêrî xebetnayîş.
* Seba pawitişê heqê heyatî îdam qedexe yo.
* Mehkemeyan de vera qanûnan de rêzgirewtiş.
* Rêzgirewtişê heqê keyeyî goreyê qanûnê merdimîye yê mîyaneteweyî û gelenekê ma. Na çarçewe de qedexekerdişê heme rengê şîdetî, tacîz, sîyakerdiş û rêznêgirewtişê rûmetê merdiman. Ma bi nê îzehetî de yewna rey girêdayîya xo bi esasê merdimîye ra vanî û hedefê ma o yo ke ma tesîrê şerî yê xirabekerdişî kemî bikerî. Ma veng danî opozîsyonê Sûrîye ke wa goreyê nê esasan hereket bikerî.” n
ANHA / NAVENDÊ XEBERAN