Serragêra 118. yê Roja Rojnamegerîya Kurd de eleqe anciya zext û êrişê vera çapemenî ser. Tirkîye de vera azadiya îfade û çapemenî zextê hikumet ramenê. Tewr vêşî zî çapemeniya azad hedefê êrişan de ya. Tenya Rojnameya Ozgur Gundem’î rê çihar aşman de bi desan cipersyayişî abiyayî.
Tirkîye de îxtidar her roj derbeyê girdî dana azadiya îfade û çapemenî ro. Raporê ke hetê sazgehanê mavênneteweyî yenê hadre kerdiş de Tirkîye rêza peyinîn de ya. Tewr peynî de Rêxistina Rojnamegerê Sînornêsilasnayin (RSF) rapora Azadiya Çapemenî yê Dinya yê 2016’î aşkere kerd. Goreyê na rapor, Tirkîye goreyê par di rêzî peyser şiya, 180 welatan de rêza 151’in de ya. Bi nay Tirkîya lîsteyê “welato ke rojnamegerî zehmet o” de ca girot.
Vera çapemenî zextê bêsînor
Rojnamegerê ke sûkanê Kurdistan de gureyenê bi îdiayê “azabiyîna rêxistin” tepêşiyenê. Bi seyan ajans û sîteyê zey DÎHA, ETHA, sendîka.org hetê TÎB amey manîkerdiş. Tewr peynî de Ajansa Xeberan ê Rus Sputnîk zî amê manîkerdiş. Zext û êrişanê îxtidar ra tewr jêde zî çapemeniya kurd bara xo gêna. Tenya Rojnameyê Ozgur Gundem’î rê bi desan cipersyayişî amey akerdiş. Badê tehdîdanê sermiyananê dewlet dadgerî zî kewt hereket û her roj Gundem’î rê jû dawa kerd a. Tewr peynî de qiseykerdoxê hikûmet Bulent Arinç’î 24ê Tîrmeh 2015î de qisey kerd û Ozgur Gundem hedef damusna. Arinç’î îdia kerd ke Gundem ’makîneya sûc’î ya û hedf damusna.
99 cipersyayişî, 51 dawayî
Sîteyê înternet yê Gundem’î ame sansurkerdiş, peycoy qartê akredîte betal bî, nika zî cipersyayen û cezayê perre yenê birnayen. Aşma Çile yê 2016î ra na het bi îdiayê zey ’Propagandaya rêxistin’, ‘Heqaretê polîsanê Tirk’, ‘Heqaretê Reîscûmhûrî rê’ 99 cipersyayişî abiyayî. Nê cipersyayenan ra 51ê ci açarniyayî dawa. Tenya jû aşma peynî de zî 22 cipersyayişî abiyayî. Derheqê Midûra Karê Nuşte yê Rojname Reyhan Çapan de 3 serr û 9 aşmî cezayê hepis ame birnayen. Derheqê Midûra Weşan yê verikîn Eren Keskîn de 1 serr û 3 aşmî ceza ame dayen.
Mahkemekerdişan de tenya cezayê girotxane nê, herzewbîn cezayê perre zî amey birnayen. Reyhan Çapan rê 255 hezar TL, Eren Keskîn rê 100 hezar TL cezayê perre birniya. Tenya vera Ozgur Gundem nê, herzewbîn vera bi desan sîte û keyepelan de sansur rameno. Sîteyê Ajansa Xeberan yê DÎHA hetê TÎB 36. reynî amê manîkerdiş. Ajansa ceniyan JINHA zî 5. reynî amê manîkerdiş. Weşanê ke teberê welatî ra weşan kenê zî Tirkîye de qedexe yê. Ajansê Firat, Rojnameyê ma Yenî Ozgur Polîtîka, sîteyê xêlê televîzyonan zî qedexe yê.
DÎHA/STENBOL
YRD: Qîrkerdişê raştiyan ramenime
Kordînasyonê YRD zî derheqê Roja Rojnamegerîya Kurdistan de damustayin da û aşkere kerd ke heta ke zihnîyetê faşîzan û sermiyanê ci bibê, Çapemenîya Alternatîf û Azad zî do bêveng nêbo. Kordînasyonî vist vîrî ke kurdan veriya 118 serran rixmê despotîzmê Abdulhatîd’î bi nameyê ‘Kurdistan’ jew rojname vet. YRD aşkere kerd ke çapemeniya kurd bi siyaseta kurd ra piya bî gird û wina va: “Her serwedarnayişî de, serwedarnayoxan ra piya çapemeniya kurd zî amê qetilkerdiş. Her sirgun rojname û kovaranê kurd rê zî sirgun ferz kerd.”
Sembolê çapemenîya azad
YRD da zonayen ke, qedexe û sansur tarîx ra heta na roj serva bêvengkerdişê çapemeniya kurd ser kar de bi û wina va: “Wext wextê werzayiş û vejîyayişê kurdan o. Bi hereketê serbestî ra piya tarîx reyna ra ame nuştayen. Çapemenîya Azad û Alternatîf zî no wextî de destpa kerd.” YRD vist vîrî ke kevneşopîya ke Mazlûm Dogan’an da destcikerdiş peycoy hetê Gurbetellî Ersoz, Enwer Polat, Xelîl Dag, Kemal Kiliçlar, Cengîz Altun, Ferhat Tepe, Denîz Firat, Rohat AKtaş, Agir Banê’yan dewr girot û da zonayen ke Huseyîn Denîz û Apê Mûsa’yan na kevneşopî malê civakî kerdî û bî sembol.
Benime veng û ziwanê azadî
YRD hayr ant ser zextanê AKP û Saray yê vera Çapemenîya Azad û wina va: “Zext û zorvajiyê nikayî dewrê Abdulhamîtî pey de verday. Zihnîyet eynî zihnîyeta. Înkar û îmha ya. La wa no bîro zanayen ke Çapemenîya Azad do her tim vera zihnîyeta despot de vindero û hetê mazlûman de ca bigîro. Çapemenîya azad do raştiyan roşnî û qîr bikero. Ma dê heta peynî bibê ziwan û vengê azadî. YRD peynî de şehîdanê Çapemenîya Azad ke raştişan ra tawîz nêdayî vîrard û Roja Rojnamegerîya Kurd pêrokîn rojnamegeranê Kurdistan’î rê bimbarek kerd.
ANF/BEHDÎNAN