Kurdistanijê Vakûr’î, rexmê qerarê ‘qedexe’ xo serva 4ê Nîsan şiyayişê Amara kenê hadre. Xêlê sûkan ra vengê tewrbiyenê nûmayiş ame dayen.
TUYAD-DER bi minasebeta 4ê Nîsan, roja dayikbiyîna Rayverê Şarê Kurd Abdullah Ocalan’î cayo ke ame dinya vera Amara şiyayişeke virazena. Rexmê ‘qedexe’ yê dewlet sûkanê Kurdistan û Tirkiye de hadreyînê şiyayişî yenê ramiten.
‘Qedexe’ nêsilasneme
Rêxistinanê KJA, HDP û DBP yê Amed û Batman zî dûştê ‘qedexe’ û qetlîaman vengê tewrbiyînê şiyayişê Amara day. Hemserokê HDP yê Amed, Omer Oner hayr ant tecrîdê ser Rayverê Şarê Kurd Abdullah Ocalan’î ser û da zonayen ke îye de bi rihê newroz biherikyê Amara. Oner vist vîrî ke ê ‘qedexe’ yê walitî nêsilasnenê. Yardimkara hemserokanê DBP yê Amed Leyla Ayaz zî ard ziwan ke serva vinderdişê herbî ganî tecrîd hewadiyo. Ayaz vist vîrî ke 3ê Nîsan de şodir seat 08.00 de wesayîtî dê ver bana DBP yê sûk ra werzê. Ayaz qiseyê Ocalanî ‘heta ke cenî azad nêbo, homet zî azad nêbeno’ vist vîrî û veng da ceniyan ke şiyayişê Amara ra pêşengtî bikerê. Serva şiyayişê Amara jew vengdayiş zî rêxistinanê Batman ra ame. KJA, DBP û HDP ke kombiyayişê çapemenî viraştî aşkere kerdî ke mîmarê cuwyana newî Ocalan o. Kombiyayişê piyayî de veng diya şarê Batman ke tewrê şiyayişê Amara bibê.
Wan de seferberî yê Amara
Wanijî zî xo serva nûmayiş kenê hadre. Hemseroka TUYA-DER Aynûr Bagiş, vist vîrî ke bi tecrîdî ra piya vera şarê kurd lej zî bi hera. Bagiş serva ke herbî rê vajerê vinde veng da şarê Wan ke tewrê şiyayiş bibê û wayrê Rayberê xo bivejyê.
Îdarekarê DBP yê Wan Mûrat Demîr’î zî hayr ant ablûqeyê dewlet yê vera sûkanê Kurdistan ser û muhîmiya nûmayişa Amara ard ziwan. Azaya Înisiyatîfê Mayanê Haştî Besna Akdogan zî vist vîrî ke serva şikitişê tecrîdî ê dê biherikyê Amara. Akdogan da zonayen ke heta ke tecrît nêşikiyo şarê kurd û hereketê serbestî dê peyser gam nîerzê. Akdogan veng da cenî, camêrd, doman, genc, kal û pîr ke vera Amara ray şirê.
Hemseroka MEYA-DER Nerîman Ûrar zî ard ziwan ke, AKP zana ke bi pêdiyayişê bi Raybertî gonî do vindero, la bi zanabiyen pêdiyayinan manî kenê. Ûrar da zonayen ke sûcdarê gonî AKP yo û serva şikitişê tecrîdî îşaretê muhîmiya şiyayişê Amara kerd. Îdarekarê sûk yê HDP Necmî Kalkiç’î zî ard ziwan ke raya vinderdişê herbî û çarekerdiş Ocalan’î ra vêrena ra. Kalkiç’î vist vîrê ke pêrokîn qezayan de hadreyînî ameyê ramiten û da zonayen ke, qezayan ra wesayîtî dê pêro piya hereket bikerê.
Ocalan sembolê haştî yo
Îzmîr ra zî HDP, Meclîsê Mayanê Haştî, TAYD-DER, YAK-DER û MKM ra piya xêlê sazgehan vengê tewrbiyayişê şiyayişê Amara da.
Azaya Meclîsê Mayanê Haştî Medîne Kaymaz da zonayen ke, zey her serr, emser zî dê 4ê Nîsan de vera Amara şiyayiş virazê. Kaymaz vist vîrî ke, 5ê Nîsan ra na het ser Ocalan’î tecrîd yeno ramiten. Kaymaz va, serba şikitişê tecrîdî bi rihê xoverdayiş û azadî ganî herkes biherikyo hetê Amara. Îdarekara TAYD-DER’î Şukriye Tûnç da zonayen ke Ocalan sembolê haştî yo. Tûnç waşt ke şarê kurd bi rihê xorayirberdişan biherikyo Amara. Şukriye Tûnç herzewbîn veng da şaranê Ege ke tewrê şiyayişê Amara bibê û va, raya haştî Amara ra vîrena ra.
Rojeke tarîxî ya
Îdarekarê şûbeyê MKM Abdûrrahman Kiliç’î zî vist vîrî ke biyayişê ke nika Rojhelata Miyanî de benê, hetê Ocalan’î veriya çend serran ameyê wendin û da zonayen ke Ocalan wayrê rolekê gird o. Kiliç’î ard ziwan ke 4ê Nîsan tenya roja ameyina dinya niya. Serva şarê kurd rojeke tarîxî ya. Nayî ra gune ma wayrê na roj bivejyê. Kiliç’î da zonayen ke, zey MKM îye de zî 4ê Nîsan de Amara de bê. Îdarekara HDP yê sûk Fevzîye Pulat û Îdarekarê YAK-DER Mehmet Demîr’î zî veng day şarî û waştî ke bi rihê Newroz û xoverdayişî 4ê Nîsan de meydanan de bê.
NAVENDÊ XEBERAN