Mabênê 19’ê adare û 26’ê nîsane 2015 de 49 şaristananê Tirkîya û Kurdistanê Vakurî ra 2 hezar 201 kesîy beşdarê anketî bîyî. Anket de derheqê weçînitişî de xeylê persîy estbîyî, yew beş kî derheqê “mesela kurde” der o. Cewaban ra merdim vîneno ke zafê mewzûyanê kurdan de fikrê hemwelatîyanê Tirkîya hema nêvurîya.
Sey nimûne, seyî ra 65 yê pêro weçînitoxanê Tirkîya vanêy ke: “Mesela kurde bi raverşîyayîşê ekonomî yê herêmanê Başûrê Rojhelatî û Anadolîya Rojhelatî” (yanî Kurdistanê Vakurî) hel bena. Eksê ci de, tena seyî ra 41 vanê ke mesela kurde bi: “Hîna zaf selahîyet seba îdarekeranê cayîyan” çareser beno. Yanî, zafêrîya weçînitoxanê Tirkîya ra gore mesela kurde meselêyka ekonomîk a, yê kultir û nasnameyî nîya. Tena weçînitoxanê HDP mîyan de seyî ra 55 vanêy ke gerek sermîyananê Kurdistanî rê hîna zaf selahîyet bêro dayene.
Eke bêrîme mesela ziwanê dayîke û perwerdeyê bi ziwanê kurdkî, zafêrîya weçînitoxan wesetî seyî ra 77 duştê perwerdeyê bi ziwanê kurdkî der ê. HDP netede, weçînitoxê AKP (seyî ra 78), CHP (seyî ra 85) û MHP (seyî ra 91) vanê ke: “Koma etnîkî ya yew domanî çi bena wa bibo, ganî her doman verê veran perwerdeyê xo bi tirkî bivîno.” Tena weçînitoxê HDP bi seyî ra 55 duştê nê fikrî der ê. Ancîya, tena seyî ra 36 yê weçînitoxan vanê ke dayîreyanê dewlete û şaredarîyan de xizmet bi ziwanêde bîn kî bêro dayene. Duştê ney de reyna HDP bi rêja seyî ra 77 esta. Zafêrîya weçînitoxan fikirînê ke efo pêroyî seba gerîlaê PKK ke çekanê xo caverdê, qebul nêbeno.
AMED