Rayber Apo bîyo hêvîya hemeyê dinya

Endamê Komîteya Merkezî ya PKKyî Cemal Şerikî va ‘hêvî Rayber Apo û xoverdayîşê Kurdan o’ û wina dewam kerd: “Rayber Apo tena seba ma nê, seba merdimîye hêvî yo. Rayîro ke hetê ê ra ameyo ramotene de şarî têkoşîn danî û benê wayîrê qezencan. Rayber Apo bîyo hêvîya hemeyê dinya.”

Endamê Komîteya Merkezî ya PKKyî Cemal Şerîkî derheqê Şorişê Rojawanî, şerê mabênê Modernîteya Demokratîke û Modernîteya Kapîtalîste ya Rojhelatê Mîyanênî û cigêrayîşê seba çareserîye de qisey kerd û fikrê xo vatî.

Şerîkî vist vîrî Rojhelato Mîyanên dergûşa panc hezar serrî ya û esasê bingeyênî yê şaristanîye; sinife, bajar, dewlete na herême de vejîyayê werte. Şerîkî da zanayene ke krîzê sîstemê şaristanîye yê panc hezar serran ê sinife, bajar, dewlete nika Rojhelato Mîyanên de dereceya tewr berze de yê û va, ‘Hetêk ra no esto, hetê bînî de zî hêzê Modernîteya Demokratîke estê ke xusûsîyetanê cimatkî tarîxkîyan temsîl kenê’.

Şerîkî va ‘şerê Rojhelato Mîyanên de mabênê hêzanê Modernîteya Demokratîke û hêzanê Modernîteya Kapîtalîste de yo’ û wina dewam kerd: “Xîlafo bingeyên mabênê nînan de yo. Na yewe dewrê nikayî de xo bi hawayêkê cîyayî ramojnena. Xo sey hêzê Modernîteya Demokratîke nimûneyê Rojawanî yê Kurdistanî ramojnena ke bi hawayêkê cimatkîyî organîze benê, têkoşînê nê danê. Hezê Modernîteya Kapîtalîste zî seba bieşkê zereyê nê krîzî de hemleyêk bikerê, organîzasyonanê hemkaran xo rê virazenê. DYA kena ke her yewê înan sey eyaletêk xo organîze bikero. Na yewe zî cigêrayîşê înan ê seba cira vejîyayîşê krîzî yo.”

Bêxera ci çareserîye mumkin nîya

Şerîkî dewam de wina va: “Ma rayîrê modernîteya şaristanîye sey rayîro tekane yê çareserîye vînenê. Ma vanê ke Şaristanîya Demokratîke zî yena manaya newe ra organîzebîyayîşê Rojhelatê Mîyanênî goreyê rastîya xo ya tarîxî û cimatkîye. Ma nê zî sey Konfederasyonê Şaran o Demokratîk ê Rojhelatê Mîyanênî şinase kenê. Seba Konfederasyonê Şaran o Demokratîk ê Rojhelatê Mîyanênî awan bibo zî ganî her dewlete zereyê xo de bi hawayê sîstemê demokratîkî, xoserî û konfederalî organîze bibo. Na yewe zî bi şaranê zereyê xo û dormeyê xo hîra beno, biname kenê. Teberê na yewe de çareserîyêka bîne mumkun nêya.”

Eke nêro diyene, Şorişê Rojawanî fam nêbeno

Şerîkî va ‘bi na rastîye ganî Şorişê Rojawanî yo nikayên rind bêro ercnayene’ û wina domna: “Şorişê Rojawanî nika agêrayo Şorişê Vakur û Rojhelatê Sûrîye. Ganî na yewe bêro dîyene. No şoriş halkerdişê problemanê şaranê Rojawanî ra wetêr bîyo şorişê demokratîkbîyayîş û azadîya heme şaranê Sûrîye. No vurayîşêko wesifkî yo, ganî sere de no bêro dîyene. Heta ke no vurayîş nêro dîyene merdimî nêeşkenê Şorişê Rojawanî fam bikerê.”

Rayîrê ci de şarî benî wayîrê qezencan

Şerîkî peynîya qiseykerdişê xo de va ‘hêvî Rayber Apo yo’ û wina qedêna: “Hêvî xoverdayîşê Kurdan o. Gerîla yo ke rixmê zext û hêrişan de derbeyanê giranan dano hêzanê TCyê dagîrker ro. Hêvî Şorişê Rojawanî yo. No tena seba ma hêvîyêk nêyo, seba merdimîye hêvî yo. Rayber Apo vera rastîya merdimê xerckerdeyî û cimatê xerckerdeyî de bi roşnayî. Rayîro ke hetê ê ra ameyo ramotene de şarî têkoşîn danî û benê wayîrê qezencan. No seba hemeyê dinya bîyo merkezêkê cezbî. Bîyo hêvîya hemeyê dinya. Ma zî zereyê a dinya de dilopêk ê, sey a dilope ma hîna formê xo de, hîna xurt ciwîyenê.”